بالسوري الفَصيح

عيشها غير، لك خلصت
السنة وما عرفنا كيف نعيشها غير، التلفزيون بطل يحكي عن الموضوع، وشوي شوي عملوا
حالهن مالهن خبر بالمرة، بس كل فترة والتانية بيطلع شي واحد عامل معرض جرابات
ويقولوا هاي ضمن حملة عيشها غير، وكمان سيريتل مو مقصرة باقات ورسائل، وما بعرف شو
كمان، بس يا جماعة حدا عاشها غير؟ هادا المهم، حدا فكر يسأل حدا هيك سؤال؟ يعني
مثلاً كنت متوقع الفضائية تعمل هيك شي، تروح تسأل هالناس، كيفكن؟ أنتو عشتوها غير
شي؟ أنا لح جاوبكن ببساطة لأني بصراحة عشتها غييييييييييير شكل، يعني بحياتي ما
تبهدلت واتشرشحت، وأكلت هوا إلا بهالسنة، وقفوني عشرين مرة ع الحواجز، وأخدوني على
بيت خالتي، وكهربوني عشر مرات، وأكلت عشرين فلقة، وتلت مرات بساط الريح، غير
الحباشات من كفوف وشوطات، ونعرات، طبعاً كل هالشي لأنو صورة هويتي مختلفة شوي،
يعني بالهوية ما كان عندي شوارب وهلأ صار عندي شوارب، والله وكيلكن لما بيجحش اللي
واقف ع الحاجز ما بيعود في شي بيقنعو إنو هالحمار اللي بالصورة هو أنا، مو حدا
تاني، يا معلم، ربينا شوارب، شو الغلط بالموضوع؟ كول…. بدك تضحك علينا، هوية مين
هاي ولا؟ وعند هالسؤال بعرف إني لح عيشها غير، ولح يبدا نهار جديد، ويمكن شي مليون
سوري عاشوا متلي غير، غييييييير… تمنيت إني كون متت غير، منشان يتهنوا الشباب
الطيبة، وتصفالهن البلد، لأنو نحنا شعب ما بيعرف يعيش، بيعرف يموت بس…