بالسوري الفَصيح

قطعة اي قطعة لأ، حارة إي حارة لأ، ثكنة إي ثكنة لأ، طيب ضيعة إي ضيعة
لأ، وهاي الضيعة إلكن وهديك الضيعة إلنا، هديك الحارة لإلهن، والحارة اللي بعدها
لإلنا، منيح، عنجد منيح، هلأ إنتو رح تصيروا سوريين شرقي، ونحنا رح نصير سوريين
غربي، نحنا هيك بدنا لأنو الهوا الغربي بيناسبنا أكتر منكن، منيح هيك، وبما إنو
سيادتو ناوي يعطي الجنسية لكل اللي عم يدافعوا عنو، ويمكن والله أعلم يسقطها عنا،
فلازم يكون في سوريا بتناسبو هو وجماعتو، هو يمكن مفكر يسميها بيت الأسد وشركاه
لصناعة البراميل المتفجرة، لأنو حضرتو مفكر حالو أبو البلد بيعطي وبياخد كيف ما
بدو. اسماع يا ولد هاي البلد اللي الله غضب عليها وخلاك تصير رئيس عليها هي بلدنا
نحنا مو بلدك أنت، وهالكم حرامي ومجرم اللي حواليك ومفكرهن صحاب البلد، فشرت، بالعربي
يعني خسئت وإذا ما فهمت اسمحلي قلك تباً لك، وافهمها كيف ما بتفهما يا ولد. بلدنا
اللي دفعنا منشان حريتها نص مليون شهيد، بلدنا اللي كل ذرة تراب فيها بتعنينلنا
حكاية وزكرى، بلدنا يا ولد، مو بلد اللي خلفك.