بالسوري الفَصيح

بتتذكروا برنامج غداً نلتقي؟ طيب برنامج من الألف إلى الياء؟ طيب ازا كنتو
بتتزكروا هالبرنامجين معناها أكيد بتتزكروا برنامج أم عمار قصدي ماريا ديب تبع
الأغاني، تزكرتوه؟ إي منيح، امبارح إجاني كابوس يا لطييييف، شفت حالي عم ابعت
رسالة لبرنامج ما يطلبه الجمهور، وترد علي أم عمار وهي متل المساعد أول بالجيش
لابسة قميص نص كم، وعم تقول من السوري الفصيح يهدي أغنية يا حيف للفنان سميح شقير
لرفقاتو السوريين بدرعا وحمص ودير الزور وإدلب وحلب بمناسبة العيد الرابع لثورة،
ويتمنالهن سنة جديدة مليانة حب وفرح، من أبو يزن في مطار أبو الظهور العسكري
المحاصر إلى أم يزن في مصياف مع المحبة، ومن الرقيب أول خضر إلى الخطيبة في حمام
القراحلة. متخيلين كيف كانت حالتي لما فقت من النوم، عن جد حدا بيقدر يتصور حالتي،
العما ماريا ديب بأحلامي، لك هي كوابيس، كوابيس، ومالكن بالطويلة قلت لحالي شو
بدنا بهالتخاريف؟ فتحت التلفزيون على سوريا دراما نطتلي وحدة مزيعة اسمها سندريلا
الجعبري إي شو هاد صحي هي صبية ومميشة شعراتها ولابسة جينز بس الله وكيلكن ما
بتختلف عن أم عمار بشي نسخة طبق الأصل، قال وشو برنامج تيك فيديو وأحلى شغلة بكل
هالطبخة قال حاطين إعلان لكل واحد حابب يبعت إنتاجو اللي عملوا وهني رح يعرضولوا
إياه. تخيلت حالي بعتلهن مقطع فيديو من شي مظاهرة، أو شي مقطع فيديو مسرب من شي
فرع من الفروع تبعهن، يعني شي كابوس تاني ع الماشي. الله يمضي هاليوم على خير، ما
طلع الصبح إلا كنت متشاهد، أول ما فتحت التلفزيون طلعتلي وحدة ع الإخبارية اسمها
أريج فرزلي لك العما شو زكرتني بالمزيع رجا فرزلي تقول بنتو… معقولة تكون بنتو؟
لأ مو معقولة، ليش نحنا عايشين ببلد وراثي شي؟ بعدين شو دخلها ماريا ديب برائدة
وقاف؟ عنجد دخلها شي؟ خبيصة…

واحد سوري