بالسوري الفَصيح

سوري 1: خيو، بتعرف إني اليوم منشرح على غير العادة؟

سوري 2: خير إنشاء الله هات خبرني وشو سبب انشراحك؟

سوري 1: يا سيدي قررت اعمل بالنصيحة التاريخية البدوية الشهيرة اللي بتقول: إن جنوا ربعك عقلك ما بيفيدك

سوري 2: إي على أساس نحنا عاقلين يعني؟ ما علينا، هات لنشوف وشو رح تساوي لحتى تأجر الطابق الفوقاني؟

سوري 1: شوف يا سيدي بدي بطل شوف أخبار، وجيب كم شريط لسارية السواس وحمزاوي وعلي الديك، وعيش حياتي، يعني شو بدي بصرعة هالراس لسه كل يوم قاعد عم دخن وشوف أخبار واقهر بحالي.

سوري 2: إي والله ممتاز، وبتعرف شو جبلك شي لعبة بلاي ستيشن متل صاحبنا واقعود لعاب، تسلى عين عمك، وإزا حدا حاكاك بالشرق رد علي بالغرب، وهاكوزا.

سوري 1: شو عم تتمسخر؟

سوري 2: لك لا والله بس عم ساعدك بالأفكار، لأني أنا كمان فكرت ساوي هيك.

سوري 1: عم تمزح مو بالله؟

سوري 2: لك عمي ما عم بمزح، لأنو وين ما رحت ما عم اسمع غير “عيشها غير” يعني كنا بـ “سوا” صرنا بـ “عيشها غير” لأنو “سوريا بخير” و “الأزمة خلصت” خلص ما بقى في شي.

سوري 1: والله كنت عرفان إنك رح تتمسخر على حكياتي، بس تصطفل أنا رح اعمل اللي ناوي اعملو وأنت تصطفل.. بس دخلك شو هالصوت؟ موكأنو قصف؟ افتاح التلفزيون خلينا نشوف شو صاير؟

سوري 2: لك شو قصف ما قصف هاي أخبار مغرضة، عيشها غير لك عمي، مو سمعان صوت العصافير، وبردى عم يخدق خدق، وصاحبك الحمزاوي عم يغني…. ويا ليل يا عين… وعيشها غير…

واحد سوري + واحد سوري