بالسوري الفَصيح

أبو بسام ابن عمتي زلمة طيوب ودرويش وعلى باب الله، بيشتغل باطونجي، لا بيحكي بالسياسة ولا بيفهم فيها، و ما بيعرف الخمسة من الطمسة متل ما بيقولوا لا بيقرا ولا بيكتب، وبحياتو ما دبح جاجة، بيخاف من الدم، ومن كل شي أحمر، متجوز وعندو ولدين الله يخليهن شاطرين بالمدرسة وعين الله عليهن، بيقول إنهن طالعين لخوالهن، ومتمني يخليهن يصيروا واحد دكتور وواحد مهندس، من شي شهرين كان مارق ع الحاجز وسحبوه، واختفى الزلمة، سألنا عنو هون هون ما حدا بيعرف عنو شي، من كم يوم بعد نشرة الأخبار طلع ابن عمتي ع التلفزيون، قعدنا أنا ومرتي وولادي نتفرج على اعترافاتو، شي بيكشش البدن، الزلمة مو مخلي شي مو عاملو، العما قتل وضرب ودولارات وريالات، ودنانير، وخطف، شي مو طبيعي الله وكيلكن، أنا تجمدت بمكاني من الخوف، ومرتي ضبت شنتايتها وبدها تروح لبيت أهلها لأنو طلعنا عيلة إرهابية ومانا عرفانين، ولادي فاتوا ع الأوضة وعم يدوروا ع المسدسات والبواريد وخلافو، شي مو عادي بنوب، لك العما معقول أنا بكون كمان عاملة شي عملة وماني عرفان، لك إذا أبو بسام طلع زعيم تنظيم إرهابي معناتو أنا بطلع التنظيم كلو، يعني هيك خبط لزق أخدوه وعم يتبلوا عليه، أكيد مو هيك، وإلا شو رأيكن معقولة إعلامنا الوطني بيطلع كداب؟ فشر هادا إعلامنا الوطني، ونحنا الإرهابيين، قال باعها قال…

واحد سوري إرهابي