بالسوري الفصيح

الحمد لله جهزت وراقي وطالعت جواز سفر ومشي الحال، دفعت اللي ورايي واللي قدامي لحتى خلصت، وصرت جاهز، ابن خالتي وعدني يبعتلي فيزا ع الإمارات ما زبطت قال ما عم يعطوا فيزا للسوريين وشرحوا ابن عمي بقطر، قلت لحالي بستنى ابن عمي التاني بالكويت بلكي الله يفرجها ويمشي الحال وسافر متل كل هالناس، لك العما صرت افتح موبايلي ما لاقي حدا اتصل فيه، كلهن سافروا شي على أوروبا وشي بتركيا وشي بمصر وشي بلبنان، إي والله صفيان ما في حدا العب معو برتيه ورق، بقعد ع الفيس خمس ساعات وأنا عم بحكي مع الناس، كلهن برا، وكلهن بيقولولي طلاع، لك شو قاعد عم تساوي، الله وكيلكن ما عم ساوي شي بس حدا يقللي وين بدي اطلع؟ المهم وبلا طولة سيرة يا جماعة الخير، صاحبي أبو عبود عم يشتغل بلبنان معلم شاورما وأمورو ماشية قلي تعال لك خيو إلا ما نلاقيلك شغلة هون، ودعت المرا وبوست الولاد، وشي بدي اطلع من البيت دق التلفون، رديت طلع خالي وصفي قللي لا تسافر، العما ليش خال شو صاير، قللي دير بالك بيلقطوك ع الحدود وبياخدوك ع الجيش، خالي جيش شو أنا خالص جيش من زمان، قللي ارجاع وبلا قلة عقل، ما في حدا بيخلص جيش عنا، إذا أنا طلبوني استحياط، لك العما خالي طالبينوا استحياط، أكلناها، وهي السفرة راحت بمعيتكن شباب اللي معو شي فيزا زيادة يبعتلي ياها الله وكيلكن ما بقى غيري بالبلد…

واحد سوري