صدى الشام موقع يهتم بما وراء الحدث
خير يا رجل ليش هيك صابغ شعراتك أبيض بأبيض؟
عن جد ما بتعرف؟
لا والله خير شو صاير معك؟
لك شو صاير معك كأنك مانك عايش بالبلد.
عمي عايش بالبلد، بس شو دخل العيشة بالبلد بشعراتك اللي صايرين مثل شعرات سليم كلاس الله يرحمو؟
اي اسماع لكان، الجماعة بلشوا يلموا ناس ع الاحتياط، ومبلشين قشط على أبو جنب، بس تمر ع الحاجز يعبوك بالبيكاب، ويطيروا فيك طيران على شي جبهة من الجبهات.
يا لطيف، والله سمعت هيك شي، بس نحنا شو دخلنا هني بدهن شباب عمرهن أقل من أربعين سنة.
أربعين سنة شو أنته التاني الجماعة عم يقشطوا قشط أربعين خمسين ما بتفرق، المهم تقدر تطلع بالبيكاب وتوصل ع الجبهة.
يا حبيبي،
إي لكان شو مفكر، من يومين أخدوا ابن عمتي كان بسوق الهال عم يشتري سحارة بندورة، وهلأ صار قريب من حمص عم يقمقش حطب.
العما إذا صحيح والله أكلناها
إي لكان عمي أكلناها وشربناها كمان، بدنا ندفع ضريبة غالية ثمن سيادتنا الوطنية، مو بعيدة بكرا يصيروا يلموا النسوان لحتى يدافعوا عن الصمود والممانعة.
طيب يعني هيك ما رح يمسكونا؟
هلأ هني بس شافوا شعراتي قالولي الله معك عمي، وبالأخص وأنا لابس هالنضارات الطبية، وحاني ضهري خمسة وأربعين درجة على مقياس ريختر، وهيك صارلو يومين ماشي.
إي والله منيح، فكرة كويسة.
بس تعرف شو، والله خايف اتعود على هالحالة وما بعود اعرف أمشي متل ما كنت قبل.
اي دخيلك كتير مهم تمشي منتصب القامة مرفوع الهامة مثلاً
لا مو مهم بس عم قلك خايف اتعود
اي اتعود تاج راسي، وشوفيها، أصلاً شكلو لسليم كلاس كتير ظريف، وماب وشي.
قولتك، ماشي الحال…
يا الله بخاطرك
شو وين لسه ما شربنا الشاي؟
شاي شو لك عمي خليني الحق ابو علي الحلاق قبل ما يسكر، بدي روح اكبرلي شي تلاتين سنة قبل ما يجوا ويقشوني، أنا مو لقيان نكشة.
اي روح، روح الله معك حجي…
واحد سوري + واحد سوري
