بالسوري الفصيح

بتتزكروا سوريا؟ قصدي حدا متزكر سوريا؟ هالحكي مو للناس اللي طلعوا برات
البلد، لأ هالحكي للناس اللي لساتهن بالداخل، يعني لا بالمخيمات، ولا راكبين بشي
سفينة بالبحر، ولا وصلوا لأوروبا وغيرها، عنجد بتتزكروا سوريا؟ بتتزكروا شو كان
اسمها بلدنا قبل الاسم الجديد اللي صار إعلام الممانعة والصمود يصرعنا فيه كل ما
صحلهن، لك إزا بدهن يحكوا عن طبخة البرغل بالحمص، بيقولوا عنها أكلة من عمق
الأصالة، وإزا بدهن يحكوا عن علي الديك، بيحكوا عنو كأنو طارق بن زياد، وعامل
فتوحات بكل مكان، وخود إزا شي مرة خطرلهن يحكوا عن الجيش، جيش أبو شحاطة ما غيرو
الله وكيلكن بتفكرهن عم يحكوا عن الجيش الانكليزي، ولا كأنو الجولان إلو أربعين
سنة محتل، وما بيقدر عسكري سوري يحكي عنو، إنو الفن بسوريا شي غير شكل، والآثار
بسوريا ما في متلها، والطبيعة عندنا يا ويلي الله ما خلق متلها، وجبل قاسيون هو
الجبل الوحيد بالعالم، ودمشق أحلى من كييف، وما بعرف شو أحلى من ما بعرف شو،
وبتعرفوا لما بدهن يحكوا عن التنمية، تعا تفرج يا عمي، قال نحنا سبقنا العالم كلو
بالتنمية، طب وهندسة وفيزيا وكل شي، بس إزا شي مسؤول أو ابن مسؤول أو مرة مسؤول أو
صاحبتو للمسؤول صابهن شي مرض بينطوا نط على لبنان، وبيروحوا يعملوا عملية هونيك،
ليش حبيباتي مو على أساس الطب عنا غير شكل، وليشلحتى تخلوا ولادكن يروحوا يدرسوا
برا مو جامعاتنا منارات المعرفة والعلم، وجامعة دمشق من أعرق الجامعات العربية،
وشو كمان، حكي كتير، نحنا اللي قاعدين جوا بنشوف التلفزيون كل يوم، وبنسمع عن
سوريا، اللي بيحكي عنها التلفزيون، وبنحبها كتير، ومن كم يوم ابن أختي قال بدو
يجهز وراقو منشان يطلع يدرس بسوريا، قلتلو لك اقعود لك خالي هاي سوريا اللي عم
يحكوا عنها بعيدة كتير، بعيدة وبدها آلة سفر ع الماضي، بدك ترجع لورا خمسين سنة
بالقليلة لحتى توصل على سوريا، الولد ما فهم كلامي، وشرحتلو وياريتني ما شرحتلو،
لأنو الولد جن، إي عن جد جن، قال معقولة يا خال الناس بتمشي لقدام ونحنا بنرجع
لورا، وصار يغني هوارة، وصحي منشان ما ينط حدا لبناني ويقول الهوارة تراث لبناني،
لأنو تلفزيون الدنيا الله يخليلنا ياه قال إنو الهوارة سورية أباً عن جد، لأنو لما
طلعت الهوارة كان لبنان تابع لسوريا عرفتو شلون، وبعدين لما قدموس راح على أوروبا
وما بعرف شو عمل هونيك، علم أوروبا كل شي، يعني لو ما قدموس كانوا الأوروبيين لهلأ
عم ياكلوا مفركة بطاطا بإيديهن، وعايشين بالكهوف، نحنا هون بسوريا الصمود والتصدي
أصل العالم، وأحسن بلد بالعالم، وعنا قائد فلتة زمانو، عايش سنتين بأوروبا
وبهالسنتين علم الأوروبيين كيف بيصيروا بشر، نحنا اللي علمنا البشرية صناعة
الملوخية، نحنا هون بسوريا، ما في متلنا خلقنا الله وكسر القالب، روحوا اتفرجوا ع
التلفزيون شي نص ساعة، وبعدين احلموا تروحوا على سوريا، جهزوا وراقكن، واركبوا آلة
الزمن، واستنوا إلا ما يجي القطار، و تروحوا على سوريا، صحي لا تنسوا إني عم حاكي
الناس اللي جوات سوريا، لأنو اللي برا الله مو رضيان عليهن حرمهن هالنعمة ورح
يتبهدلوا و لا رح يصير عندهن لا صمود ولا تصدي.

واحد سوري