بالسوري الفصيح

نجح بشار هيييييييييييييي، وهالمرة زخّ الرصاص مو ع
الناس العُزَّل يا حيف على قولة صديقنا سميح شقير، لأ، هالمرة الرصاص نزل متل
المطر ع الناس الفرحانين، مبسوطين يخزي العين شو مبسوطين، لأنو كانوا خايفين إنو
ما ينجح، بتعرفوا ليش، لأنو المنافسة كانت حامية الوطيس، تلت مرشحين ودعاية
انتخابية ومنافسة شريفة، ولو شو شريفة، الله وكيلكن الشرف بينقط تنقيط، لدرجة إنو
هالتلفزيون السوري كان عم يبث دعاية للمتنافسين، ونقاشات الله وكيلكن شهر كامل
حسينا حالنا عايشين بشي كوكب تاني، شو كوكب، غير شكل، لأ بدي ضحكُّن على شغلة لما
طلعت النتائج طلع في ناس منتخبين حسان النوري إي والله عنجد منتخبينو وعطوه
أصواتهن، وفي ناس منتخبين شو اسمو التالت لك إي ماهر الحجار، انتخبوه كمان، طبعاً،
ومتل العادة بلشوا الناشطين تبع الفيس بوك نكت وتقفيل، قال شو المخابرات عم يدوروا
على هدول اللي انتخبوا النوري والحجار، بس أنا بحب طمنكن إنو المخابرات ما لاحقوا
حدا أبداً، لك إزا هني قايليلهن روحوا انتخبوهن كيف بدهن يلاحقوهن، المهم، خلص
العرس الديمقراطي، وتبهدلت أمريكا وفرنسا وسويسرا لأنو ما عندهن ديمقراطية متل
اللي عنا لك شو عنا، يخزي العين عنا، أحلى شباب وحياة جوز خالتي، رقص وفرح وطبول
وأغاني، شي بيسر الخاطر ع الآخر، تصريحات المواطنين شي رفع، لك العما هالسهيانين
طلعوا بيعرفوا بالانتخابات، وكأنو من يوم يومهن بينتخبوا، شي فظيع شعب ذكي يا أخي،
شعب نبيه، لأ مو نبيه بري، بيجوز نبيه الوحش اللي قطع دنب الوحش، بس الوحش قوي
عصو، زيادة، وصار ماشي متل الديك نافش ريشو، أنا نجحت بالانتخابات، وأنتو
انتخبتوني، لا تقلي تزوير وما تزوير، كان في مراقبين من كل الدنيا، من كوريا
الشمالية لموزمبيق، إجو تغدوا وانبسطوا، وشربوا أراكيل عند أبو شفيق، وراقبوا الانتخابات،
إي شو يعني ما عجبها لأمريكا، أصلاً أمريكا دولة استعمارية، وحكيها ما بيهم نحنا
أهل الصمود والتصدي وشي وقيتين مقاومة، وأهم شي المقاومة، العما بكل جملتين
بيقولوها الناس بالشوارع بتنط المقاومة، بتمد
راسها متل الجنية هيه أنا المقاومة، شفتوني ما أحلاني، انتخبوووني، هلأ أنا
متل ما قلتلكن قبل لا رحت ولا إجيت، مو لأني بكره المقاومة، بس لأني ما بعرف شو
يعني المقاومة ولا شو يعني الانتخابات، أهلي ما علموني هالشغلات، كانوا يقولولي
لما كنت صغير، بلا هالحكي بيجيب وجع الراس، منشان هيك ولأنو البندول غالي بعدت عن
هالحكي، وصرت لما بشوف حدا يحكي عن الانتخابات ببعد عنو، عمي يستر عرضك حل عني،
أنا متعود ع الاستفتاء، وما بعرف شي غير الاستفتاء، هلأ بعد هالكبرة بدك تلبسني
جبة حمرا، والله ما حلوة بحقي، ما حلوة بنوب، صحي الكهربا مقطوعة والدنيا شوب، والراتب
يا دوب، بس نحنا انتخبنا قائدنا المحبوب، وبكرا رح ترجع الدنيا لورا، لورا
أناريييييييه. هوب هوب، خبطت صندوق الاتنخابات وانكبوا الأصوات، يحرق عرض هالقصة..
ليش ضل في قصة بالأصل، صحي مين رح تنتخبوا بكأس العالم؟

واحد سوري “مو فهمان شي”