صدى الشام موقع يهتم بما وراء الحدث
والله طلع هالعالم فيه خير وقدر يوصل المساعدات الغذائية لمضايا، وقدر يقنع النظام وحزب الله إنو يسمحوا للشاحنات يفوتوا ع المدينة. العما إنسانية غير شكل، يعني كل شي كنت متوقعو أنا شخصياً صار بالعكس، يعني كنت متوقع مثلاً إنو النظام يرفض، ويتنادل شوي متل عادتو، بس طلع فيه خير ووافق، سبع شهور حصار والناس أكلت العشب من الأرض، وشركاءنا بالوطن شايفين شو عم يصير بمضايا وما حدا فيهن فتح تمو وحكا شي، صارلنا سبع شهور بنعرف إنو مضايا محاصرة متل ما بنعرف إنو الدير محاصرة والتل والغوطة، بنعرف كل شي، وكنا نشوف الصور، ونحن بنعرف إنو آخرة الحصار هي الموت من الجوع، يعني ما بدها كتير تفكير، ليش العالم الواطي عم يخلي الأمور توصل للأخير وبعدين يتدخل، يعني بيستنى الناس لحتى تموت وبعدين يفوت منشان يشيل الجثث. وصدقوني هيك رح يصير بعد فترة بدير الزور، إي، بعد فترة رح نبلش نشوف صور الناس الميتين من الجوع، ورح نشوف الولاد الزغار وهني عم يموتوا وما رح يطلع بإيدنا نساوي شي غير نحزن لأنو العالم كلو تاركنا عم نموت من خمس سنين. ليش من إيمته العالم بيهموا موتنا؟ خلونا نرجع لأخوتنا في الوطن، هدول اللي بيقولوا علينا متآمرين وخونة لأنو طلعنا برات البلد، طيب يا خي نحن خونة، وعملاء، ماشي، بس أهل مضايا قاعدين قدامكن، لا راحوا ولا إجو، مضايا اللي كنتوا تروحوا تتسيرنوا عليها، ليش ما قلتو لسيدكن يرفع الحصار عنها؟ ليش ما قلتولوا؟ كنتوا خجلانين منو حبيباتي، يقصف عمركن وعمرو، لك والله وبكسر الهاء نص مشكلتنا سببها انتو، خليكن ساكتين، إي خليكن ساكتين، بكرا بس تتحاصروا رح تشوفوا إنو نحنا أحسن منكن، جاي هداك اليوم.
