بالسوري الفصيح

الحكي مو متل الشوف، عن جد، واللي بيقلك غير هيك قلو كزب، لا تصدق ولا كلمة، لما تركب بالبلم إنت وولادك الصغار، وما بتعرف ازا كنتوا لح توصولوا بسلامة أو لأ، ولما بيهيج البحر وبيطلع لفوق مترين، وبيصير البلم يطلع وبينزل وبتحس حالك عاجز وعم تستنى ملك الموت، بهديك اللحظة بتنسى كل شي، ما بيعود عندك لا زاكرة، ولا حنين ولا أشواق ولا أي شي تاني، بتقول لحالك يا ربي نجيني، ولما بتطلع الموجة لفوق بتقول يا رب نجي ولادي وخدني، ولما بينزل البلم وبينخبط خبط بتصير تصرخ يا رب موتنا وارحمنا من هالعزاب، لما بتوصل ع الشط وتلاقي حالك لساتك عايش انت ومرتك وولادك بتبكي، بس ما بينزل دموعك، بتنسى من وين إجيت ولوين رايح، بتنسى كم سنة صارلك عايش، ما بتفكر شو تركت هونيك ولا مين تركت، ولا شو لح يصير بعد شوي، بتحس حالك طفل صغير، وهلأ لح تبدا حياتك، بتبكي متل الولاد الصغار، ما بيهمك ازا في أكل والا ما في، ما بيهمك ازا لح يحطوك بخيمة أو ببيت، ما بيهمك شو اسم البلد اللي لح يستقبلك، لأنك بهديك اللحظة تحديداً بتكون ولدت، صار اسمك ناجي. كل اللي بيطلعوا من البحر بيصير اسمهن ناجي، ولما حدا بيسألك شو اسمك لا تفكر كتير قلوا أنا ناجي، قلوا أنا ولدت من جديد… هلأ بعد كم يوم لح تصير تنق وتقول يلعن أبو هالعيشة شو جابونا ليبهدلونا، وبتسأل إيمته بدهن يعطوك مساعدة، بس قبل بهديك اللحظات… تزكر إنك عايش وتزكر إنك طلعت من الموت… وببوس إيدك لا تنس إنو لسه في ناس ما قدرت تطلع، ويمكن ما لح تقدر.