بالسوري الفصيح

قال هادا يا سيدي في واحد اعتقلوه من نص الإخبارية السورية، بعد كم يوم مدير الإخبارية السورية قال للناس اللي بيشتغلوا لك سمعتوا هالسمعة، شفتوا هالشوفة قال فلان، قصدوا اللي اعتقلوه، طلع عم يشتغل مع جبهة النصرة، العما، شو هالحكي؟ إي والله، مع جبهة النصرة، وقال فتشوا مكتبو ولقوا عندو منشطات جنسية، وأفلام للكبار فقط، العما، شو هالحكي؟ إي والله، وامبارح حاكوني من الفرع وقالولي ما في أمل يطلع بالمرة، العما، شو هالحكي؟ إي والله، واسمعوا كمان، قال كانت مرتو عم تشتغل معو بتوصيل المعلومات، وكل شي كنا نحكيه هون بالقناة كانوا يعرفوا فيه جماعة الجبهة أول بأول، العما، شو هالحكي؟ إي والله. وقالولي بحياتو ما رح يطلع ولا رح يرجع ع الشغل.
إي بعد كم يوم طلع الزلمة من المعتقل، عرفتوا شلون، قام حمل حالو وراح ع الإخبارية السورية، استقبلو المدير ما غيرو، أهلين، شلونك، شو الأخبار، والله ما خليت حدا ما حاولت احكي معو، وهني وعدوني إني رح يطالعوك، وها ليكك الحمد لله طلعت.. إي الحمد لله. المعلم خبرني إني ممكن ارجع ع الشغل، إي أهلا وسهلا فيك بتشرف أصلاً مكتبك متل ما هوي ما حدا قرب عليه. إي لأنو المعلم سألني عنك كتير، وأنا ما حكيت ولا كلمة، قال إنت عندك مكتب بالطابق التاني عاملو أوضة نوم صحي هالحكي؟ لك العما شو هالحكي؟ إي والله… هلأ شو بدنا بهالحكي، ارجاع على مكتبك، وأهلا وسهلا فيك، وما في داعي تحكي مع التانيين، الشباب خبروني إنو مخترقين من جبهة النصرة. العما، شو هالحكي؟ إي والله.

واحد سوري
(بالمناسبة: هالحكاية واقعية مية بالمية، ومو شغل خيال… الله وكيلكن)