بالسوري الفصيح

شفتوا لما طلعوا الناس بالباصات الخضر من الوعر؟ شفتوهن؟ اطلعتوا بوجوههن، سمعتوا أصواتهن؟ حسيتوا بإحساسهن؟ بتعرفوا هاي الباصات أسوأ شي عملتو البشرية بالخمسين سنة الماضية، أسوأ من بيت الأسد، وأسوأ من حسن زميرة. هاي الباصات هي اللي ما رح تروح من زاكرتنا بسهولة، لأنو هاي الباصات الخضر من أول يوم بالثورة كانت شؤم علينا كلنا. أول شي كانت كل يوم جمعة بتنملا شبيحة منشان يروحوا يقمعوا المظاهرات ويضربوا الناس، كانوا يوقفوا قدام ملعب العباسيين وبيستنوا لحتى تخلص صلاة الجمعة وبعدين بيروحوا شي على جوبر وشي ع زملكا وشي ع دوما، وبيضلوا هيك عم يضربوا الناس للمسا، بعدين صاروا يعبوها معتقلين ويصيروا يدعوسوا عليهن، شباب متل الورود كانوا يعتقلوهن من الشوارع ويحشروهن بالباصات، ويخلوهن يهتفوا لمقصوف الرقبة، وأكيد كلكن شفتوا هالمنظر…

ضل الشعب عشرين سنة كرهان حياتو من أزمة المواصلات، ولما جابوا الباصات حولوها لمعتقلات. بعدين متل ما شفتوا صاروا يفضوا فيها المناطق، أول شي بحمص القديمة، وهلأ بالوعر… وبعدين ما منعرف وين. عم يعملوا تقسيم للشعب، ويفرغوا البلد منشان ييجوا الإيرانيين ويحتلوها متل مو مخططين، بس ما لح تزبط معهن، أنا بعرف إنو ما لح تزبط معهن، لأنو نحنا شعب راسوا يابس… ولح ننتصر بالأخر.

أهل حمص راحوا على إدلب، وأهل إدلب استقبلوهن بالأهلا وسهلا… بكرا بس يرجعوا ع بيوتهن بيقولوا والله كنا زايرين عند أهلنا بإدلب… هيك العادة، بس ابن حافظ ما لح يلاقي حدا يستقبلو، لح ينطرد برا، مو نحنا اللي هتفنا سوريا حرة حرة بشار يطلع برة…

بتعرفوا، شو كنت متمني من الجماعة اللي اجتمعوا بالرياض يقولوا إنو مستقبل سوريا لح يكون من دون الأسد ومن دون باصات خضر… والله أنا بكره الباصات الخضر.

واحد سوري