بالسوري الفصيح

صدى الشام/

عزيزي المستثمر السوري، إذا حدا طلب منك مصاري منشان شي مشروع إغاثي إقطع إيدك واشحد عليها، وإذا حدا طلب منك تمويل منشان شي مستشفى أو مستوصف اقطاع إيدك واشحاد عليها، وإذا شي حدا حاول يلعب بعقلك ويقنعك إنك تعمل شي جريدة أو إذاعة أو لا قدر الله قناة تلفزيونية، كمان اقطاع إيدك واشحاد عليها، وإذا شي مرة كنت تتفرج ع التلفزيون وشفقت ع الولاد اللي ما عم يروحوا ع المدارس من كذا سنة، وبعدين إجاك شي حدا وحاول يقنعك تعمل شي مدرسة للأطفال إن شاء الله يتعلموا فيها ابجد هوز، لا ترد واعميل حالك أطرش، واقطاع إيدك واشحاد عليها، لأ وإذا بدك احميل صينية وروح وقف قدام شي جامع، عادي، صدقني كتير الموضوع عادي، وفيك تحلف قد ما بدك إنو ما معك حق العشا، وإنك يا دوب عم تقدر تدبر أجرة بيتك اللي هو ملكك، عادي ولا تفكر بتأنيب الضمير، والحسنة بعشرة أمثالها، وهالحكي كلو، نام مرتاح ولا على بالك، بس إذا شي حدا ابن حلال ومرتب اقترح عليك إنك تشكل كتيبة، يا سلام هادا هو المشروع اللي لازم تدخل فيه من دون تفكير، افتاح صندوقك وموّل لأنو يا معلم الدولار هون بيصير عشر دولارات، كتيبة صغيرة مرتبة تعمل شي حاجز بشي مكان، وترفع العلم اللي بدك إياه، وشوف الأرباح بعدها يا معلم، وشوف كمان قديش في ناس بيصير بدهن رضاك، وبيصيروا يعملولك ألف حساب، أصلاً هيك مشاريع مصمونة 100% لأ يا سيدي وإذا بدك ألف بالمية كمان، مو شايف كيف المستثمرين عم يلعبوا بالمصاري لعب، وفيها الكتيبة تصير إسلامية أو جهادية، أو شو ما بدك، وفيها كمان تصير لواء إذا هيك الله وفقك بشي زلمة زكرتاوي يمسكها، ويا سلام إذا صحلك شي شيخ يمشي معك يا عين عمك ساعتها بتكون أمك داعيتلك، وتكون بواب السما انفتحت بوشك، فلوس يا عمي فلوس، محكمة شرعية ومخفر، يعني الحكي بيناتنا بتصير رئيس، والله وكيلك في ناس ممكن تصير تهتف باسمك…

هيك استثمار ما تضيعوا من إيدك، لأنو هاي فرصتك، وإذا نقشت معك ع المزبوط ممكن بالمفاوضات الجاية بتكون كتيبتك موجودة.. اعميل متل ما عم قلك وادعيلي، أما إغاثة ومستشفيات ومدارس وإعلام، هالشي كلو وجع راس، وخسارة ع الفاضي.. شلوني معك.