بالسوري الفصيح

صدى الشام/

بصراحة أنا مستغرب إنو في ناس مستغربين الشي اللي عملوا سهيل الحسن مع شادي حلوة، لأنو لو ما عمل سهيل الحسن هيك بيكون في خطأ، لأنو البلد بالنسبة لسهيل الحسن ولأمثالو اسمها سوريا الأسد، فيعني عادي إنو يكون الأسد هو سوريا، والأغرب من هيك إنو الناس من كل عقلهن قعدوا يحكوا عن الموضوع يومين تلاتة وعرضتوا تلفزيونات المعارضة يا سيدي وعلقوا عليه كمان واتصلت “الحرة وسام” بشادي حلوة، وقال شو عملتلوا بهدلة، يا عيني ليك وين لساتنا، معقولة لسه مفكرين إنو شادي وغير شادي ممكن يأثر فيهن كلام وسام الحرة أو غير وسام الحرة، يا عيوني إنتو هالحكي كان بيمشي من خمس سنين، لما كان لسه في ناس مخباية، ولما كانت الأمور مو واضحة، بس هلأ، لأ اسمحولي معناتو لسه ما فهمنا شو اللي عم يصير، بعدين في شغلة كتير مهمة ويمكن حكينا عنها من زمان، إنو ما سألتوا حالكن مين اللي سرب الفيديو تبع شادي وسهيل الحسن، فكرتوا شوي بالموضوع، يعني مثلاً هني بمكان ما بنعرف وين، وحواليهن عساكر، ضابط عم يحكي مع جنودو، مو هيك، طيب مين اللي صور الضابط وهو عم يحكي، أنا بقلكن أكيد واحد من جنودو، يعني ما بدها تفكير، تاني شي، شو استفدنا نحنا من القصة كلها، طيب أمري لله أنا رح قلكن، ما استفدنا شي أبداً، يعني في ناس ضحكوا شوي، و في ناس استغربوا، متل ما عم حاكيكن، وبس، يعني ما راح يفيدنا الموضوع بأي شي، طيب يا ترى الطرف التاني شو استفاد من قصة شادي وسهيل الحسن، فكرتوا بهالشي، لأ طيب خلوني قلكن، الطرف التاني اللي هو عصابة بيت الأسد، بعتت رسالة كانت طول الوقت عم بتبعتها “يا إما الأسد يا إما ما في سوريا”، يعني “الأسد أو نحرق البلد”، مو هيك، مبلى هيك صدقوني، يعني بشوية تفكير رح تكتشفوا إنو الموضوع بسيط ومانو معقد بنوب، يا بتصيروا كلكن متل شادي، يا إما تروحوا لعند معلمينكن، هاي القصة من طقطق للسلام عليكم… ويا ريت حدا يخبر الحرة وسام إنو خلاص ما بقا إلها طعمة شغلة الاتصالات، يعني ما بقا بدنا نضحك على حالنا لأنو مصيبتنا كبيرة يا ستنا، كبيرة كتير… وسامحونا.