صدى الشام موقع يهتم بما وراء الحدث
هو هو علينا يستر عرضكن ما حدا يقلي شو صار بمطار أبو الضهور، لأنو عن جد
عن جد، ما صار شي، شوية مطار هالقد قدو لح تعملوا منو نصر وما بعرف شو كمان. لك يا
حبيباتي والله الموضوع صغير كتير قد الأتوسة، بتعرفوا شو هي الأتوسة؟ الأتوسة هي
أصغر من النتوفة بشوي، عن جد سامحوني لأنو كل ما بفتح التلفزيونات المغرضة بلاقيهن
عم يحكوا عن مطار أبو الضهور مع إنو عادي، إي عادي، يعني مين أهم مطار أبو الضهور
وإلا تخريج دفعة المتميزين؟ إنتو قولوا أنا ما لح افتح تمي، إي طبعاً تخريج دفعة
المتميزين برعاية السيدة أسماء، وهلأ سؤال تاني، شو أهم مطار أبو الضهور وإلا
الحكي عن حب الشباب؟ برافو عليكن أحسنتو، الحكي عن حب الشباب لأنوه الموضوع بيهم
شريحة الشباب اللي هني حماة الوطن، طيب، طيب، شو أهم الحكي عن المطار وإلا الحكي
عن حملة عاملتها الجمعية الفلكية السورية، شايفين الاسم شو مهم، المهم الجمعية
عاملة حملة ع الانترنت منشان يسموا واحد من كواكب المجموعة الشمسية تدمر، يعني
بالميرا، هاي أهم مو هيك؟ لك طبعاً طبعاً، يعني شوفوا هني سلموا تدمر لداعش وما
ضربوا ولا فشكة، وبعدين زعلوا لأنو داعش عدمت خالد الأسعد الله يرحمو، قاموا كرموه
وعطوه وسام الجمهورية، لك العمى شو وقاحة ليش شو بقيان من الجمهورية يا بشر؟ إي
المهم، هلأ بس يسموا هادا الكوكب باسم تدمر خلاص لح تنحل كل المشاكل وبلاها تدمر
اللي اخدتها داعش أصلاً شو بدنا فيها؟ نحنا لح يصير عنا تدمر فوق، فوق يا عمي، فوق
النخل فوق، وكل ما راحت منا شي مدينة بنعمل حملة وبنسمي شي كوكب على اسمها، وهيك
بيصير في سوريا بالسما.
إي صحي ومنشان مطار أبو الضهور هلأ يمكن ما يكون محرز نسمي كوكب على
اسمو، لهيك ممكن نزرع كم شجرة ونسميهن ذكرى حامية أبو الضهور، وخلي العصابات
الإرهابية تموت بقهرها… ومع مدة لسان روحوا موتوا بقهركن.
واحد سوري
