بالسوري الفَصيح

بيقول المثل: البطل بيضل بطل حتى لو أكل توم وبصل، صحي ما في هيك مثل، بس
ماشي الحال، مشوها، يعني قاعدين قدام التلفزيون وعم تشوفوا كل يوم باب الحارة، ومو
قدرانين تتحملوا مثل واحد ما لو طعمة، يعني المخرج والممثلين والممثلات لك وحتى
المصور وتبع الاضاءة عم يتمسخروا عليكن ليل نهار، ومع هيك قاعدين عم تتفرجوا، صحي
بعد ما تخلصوا فرجة تنطوا ع الفيس بوك وتسلخوا بوست من كعب الدست، تلعنوا فيه أبو
المسلسل على أبو صحابو. بس هالحكي عم يصير من سبع سنين، يعني مثلاً جربوا تبطلوا
تتفرجوا عليه، وبس يصير وقتو طفوا التلفزيون، روحوا تفرجوا على أفلام الكرتون
والله بتحترم عقولكن أكتر، يعني بشرفكن توم وجيري مو أحسن من أبو عصام وولادو
ومرتو وكناينو؟ مبلى أحسن، كلكن عم تقولوا هيك، لكان شو ناطرين قاطعوا هالمسخرة،
لك يا شعب انتو عملتو ثورة ع النظام، ثورة ما في متلها بالدنيا، ولهلأ مو قدرانين
تتخلصوا من باب الحارة؟ لك اكسروه، بلا حارة بلا باب، أصلاً اطلعوا يمين وشمال
شوفوا حواليكن شو صار، شوفوا البلد شو صار فيها، ولسه كم ممثل وممثلة عم يضحكوا
عليكن، خلاص عيب..

بعرف ما حدا رح يرد علي، ورح تقولوا شو هالحكي الفاضي، عم نتسلى. لأ
حبيباتي انتو ما عم تتسلوا انتو عم ينضحك عليكن، عم يتمسخروا عليكن، متل ما كانوا
يضحكوا علينا بكلمة المقاومة والممانعة، أيوا يا عيني عليكن، نفس الشي، هداك ضحك ع
اللحى، وهدا نفس الشي، بقا الله يرضى عليكن افرطوها، واطفوا عالتلفزيون…
ورمضانكن مبارك.

واحد سوري