بالسوري الفَصيح

بيقولوا لما الواحد بيطق شرش الحيا ما بيعود
تفرق معو، يعني عدم المؤاخزة ممكن يساوي كل شي، ويقول كل شي، بس متل صاحبنا عيني
ما رأت، قال شو هو وحكومتو تبع الحرامية هني اللي عم بيساعدوا اللاجئين السوريين،
يا ساتر، إنو إيه ماشي صدقنا شغلات المومانعة والموقاومة، والرفق بالحيوان، وإنك
إنته اللي رح ترجع فلسطين والجولان ويمكن عربستان كمان، شو عليه هادا كلو كزب ما
عليه شهود، وما حدا شايف منو شي، بس إنك إنته عم بتساعد اللاجئين، لا ولو هاي
كبيرة هاي يعني لو قايل إنك فوتت جمل من بخواش الإبرة يمكن كنا ها شي إنو رح نصدق،
بس هاي كبيرة ولو كبيرة كتير، يعني ما بتتصدق، اسماع شو بدي قلك هدول اللاجئين
اللي بتقول إنك عبتساعدهن، انتي سبب مصيبتهن، وانتي اللي دمرت بيوتهن، وانتي اللي
موتت حبابهن، وانتي اللي خربت بلدهن، اسمعني منيح بلدهن مو بلدك، وهدول اللي بتقول
عنهن شعبك، ما فشرت يكونوا شعبك هدول أكبر منك ومن أبوك، هدول صاحوا بعالي الصوت
ارحل يا بشار، شو كأنك ما سمعتهن؟ وإلا عامل حالك مو سمعان يا ضرسان؟

بس اذا كان قصدك انك عم تبعتلهن صواريخ وبراميل
تنزل على روسهن، واذا كان قصدك انك تشغل كلابك بالسفارات يمنعوهن من أنهن ياخدوا
جوازات سفر ويسجلوا ولادهن، واذا كان قصدك انك تحاصر دير الزور منشان تموت أهلها
من الجوع والعطش، اذا كان قصدك انو لما الناس اللي كانوا مهجرين ولاجئين رجعوا على
ادلب قصفتهن بالغازات السامة، اذا كان قصدك هدول الشغلات فالشهادة لله انك سبقت
هتلر وموسوليني وما خليت مجرم بالتاريخ يكون قبلك، سبقتهن كلهن، لك انت سبقت ابوك،
بس بتعرف شغلة رغم هالشي كلو والحكي بيني وبينك بدك تسقط يعني بدك تسقط… وبكرا بزكرك.

واحد سوري