بالسوري الفَصيح

بخشوا راسنا بالرد المزلزل، صرنا ناكل ونشرب وننام رد
مزلزل، من الصبح للمسا رد مزلزل، وشي مقاومة وشي ممانعة وشي صمود، وشوباش وخمسمية
محروقة لعيون سماحة ابو نص لسان اللي جنن إسرائيل والأمريكان، وشوباش وخمسمية
محروقة لرمز البطولة والصمود كمان أبو نص لسان، وياسامعين الصوت صلوا ع النبي
إسرائيل اتبهدلت، ومرسي الزيناتي اتهزم يا رجالة، خلاص ما بقى في إسرائيل، بح خلصت
حكايتها، هالكيان الغاصب ردين مزلزلين متل هدول اللي صاروا بيسحب حالو وبيسافر
بيروح على شي دولة تانية، وإنو شو يا عمي انتصار، وإنو شو يا عمي حطمنا أسطورة
الجيش الذي لا يقهر، لك يا حبيباتي من يوم وعينا ع الدنيي وإنتو عم تحطموا
بهالأسطورة، من أيام حرب تشرين التحريكية، اللي ركبتوا على ضهورنا بعدها وإنتو عم
تنتصروا على إسرائيل، لحتى ما بقي بحمص حجر على حجر، ودير الزور كلها راحت، وحلب
صارت حلبين، وإدلب صارت شي تلاتين إدلب، وشو بدي احكيلكن لأحكيلكن، حاجتكن والله
شي بيقرف، ما تواخزوني بس اللي بيسمعكن من الصبح للمسا وإنتو عم تزلزلوا إسرائيل
بيفكرنا عايشين بكوكب تاني، إسرائيل يا عيوني إنتو بهدلتكن شي عشرين مرة وما
استرجيتو تردوا عليها، ولا مرة، وهالمرة اللي ردت إيران، فحاجة تبيضوا علينا الله
يرضى عليكن، اللي ردت إيران عرفتو كيف، ووين ردت بمزارع شبعا اللي هي سورية محتلة
ما ادري لبنانية محررة، فهمتو كيف يا أبطال؟ إيران اللي محتلة لبنان من تلاتين سنة
ومحتلتنا من أربع سنين عيني عينك ردت لأنو انقتل ضابط كبير من ضباطها، فلفوها
واقعدوا عاقلين وبلا زعبرة، لأنو إذا حضراتكن ما بتعرفوا لتر المازوت صار بميتن
ليرة، يلعن ميتين واحد منكن… وقريضة.

واحد سوري معصب