بالسوري الفَصيح

أنا المواطن السوري فلان ابن فلان العلاني أقر وأعترف
بأني سعيد سعيييييييييد لأنو السيد الرئيس منحنا منحة من منحاته الكتيرة، وصار عنا
زيادة هالقد قدها، بنقدر نجيب فيها نص جرة غاز، وعشرين لتر مازوت، وربع غرام دهب،
لك إيييييييييه، ربع غرام دهب وكيلين لحمة ضاني، وشو كمان بس بس أحسن ما تصيبوها
بالعين، بس لحظة، لحظة، إنتو شو فهمتوا من حكيي؟ لك لأاا مو هيك، أنتو فكرتوا إني
بقدر جيب كل هالشغلات بمنحة سيادتو، يحرق حريشكن شو دمكن خفيف، حبيباتي، بس عشرين
لتر مازوت، بس مو كلها مع بعضها، يحرق حريشكن عن جد إنتو خفيفين دم، وأنا عقلي رح
يخف، ليش أنا بقا فيي عقل أصلاً، قال شو ومرسوم، ومذيع ورئيس وزراء بيقعدوا
بيناقشوا أثر هالمنحة الغير شكل ع الاقتصاد الوطني، لك وشو قال رح تتحرك عجلة الما
بعرف شو اسمو بسبب هالمنحة، وإلا شوي كان المستر حلقي رح يقول بيقدر المواطن
الشريف يشتريلو شي سيارة ويصفها قدام الباب ويستنى لبينما يأمن حق البنزينات
وبعدين بيركبها، أستاذ حلقي، عفواً دكتور حلقي إجا عبالي لما سمعتك عم تحكي، وتشيل
من هون وتحط هون وتتغمى قدام الكاميرا متل الشو اسمو، إجا عبالي قلك لك حاجة عاد
احليق من هون، حاجتك كزب، بس شفتك مبسوط، مبسوط بالأربعتالاف يا تقبرني، اي ريتن
يكفنوك بشي اربعتالاف مصيبة شو إنك كزاب، وما إلك جنس الطعمة، قال عجلة اقتصاد
قال، لك حشات الدكر عجلة دولاب البسكليتة صار حقها أكتر من الأربعتالاف تبعكن…

واحد سوري