بالسوري الفصيح

سلامات يا حلوين وحلوات، من كم يوم دخلنا سنة جديدة، وإن
شاء الله تكون سنة خير عليكن، بلا طولة سيرة سهرة راس السنة كانت غير شكل، رحت جبت
نص كيلو بزر دوار القمر من محمصة القمر اللي على جسر دمر، واشتريت نص كيلو عوامة
وطلعت بوشي ع البيت، الولاد كانوا ناطرين السهرة، مرتي عملت تبولة وعجة وفتحنا
قنينة الكولا وقعدنا متلنا متل اللي سهرانين بالأوتيلات الخمس طعش نجمة، فتحنا
هالتلفزيون وقعدنا نتفرج على سهرة الفضائية السورية، الله ريتو يعدمني ياهن على
هالسهرة الممعتة، قال مسمين السهرة سوريا بكرا أحلى، إي كتير رح تكون أحلى
بوجودكن، جايبين وحدة عم تحكي عن الأبراج، وتوقعات العام الجديد، إي شو هاد، عن جد
شغلة ما صارت، ما خلت برج يزعل منها، كلكن حبايبي رح ترتاحوا، بس لما وصلت
هالمخلوقة على برج الأسد الكل تكركبوا عن جد ما عم زل عليكن، صارت تمدح وتمدح، إنت
عزيزي الأسد شغلة ما صارت، أنت عزيزي الأسد بتقدر تعمل وبتقدرتحط وتشيل، لك العما،
هي أبراج ولا برنامج عن سيادتو، لأوالمزيعة شوي تاني وتصير تهتف بالروح بالدم، لك
عمي شوصارلكن عم تحكوا عن برج، مو عن حيوان، عفواً قصدي مو عن صاحبكن، ولأنو أنا
خلقي صاير ضيق كتير، ومو لقيان نكشة، قمت طفيت التلفزيون، وقعدت فصفصف بزر، ما
صارت الساعة ادعشلحتى كنا نايمين أنا ومرتي وولادي، ولا حضرنا لا راس السنة ولا
رجلها عدم المؤاخزة، لك والله الحق عليي، في حدا براسو عقل لسه يشوف التلفزيون
السوري؟ سامحوني

واحد سوري