بالسوري الفصيح

كنت مارق بساحة
الأمويين لقيت كومة شباب وبنات مجتمعين وعم يرقصوا ويغنوا، لك خير شو القصة؟ قال حازم فاز، لك مين حازم؟ صاروا يضحكوا علي؟ العما، ليش
هيك؟ مشيت شوي وصلت على فكتوريا لقيت سيارتين حاملين علم وعم يزمروا وشايلين صورة
واحد ما بعرفو، لك شو في؟ شو القصة؟ حازم فاز، لك مين حازم؟ صاروا يضحكوا علي
كمان. العماشوصايربالدنيي؟ ما يكون حازم واحد مرشح حالو للانتخابات وأنا ماني
دريان؟ لك انتخابات شو، ما في لا انتخابات ولا بطيخ، مشيت هيك لحتى وصلت على ساحة
المرجة، ونفس الشي رقص وطبل وما بعرف شو، وكمان فرحانين لأنو حازم فاز، هالمرة ما
سألت حدا، قربت شوي شوي، لحتى فهمت القصة، قال هادا حازم واحد سوري فاز باراب ما
بعرف شو، وهالناس فرحانين، سألت واحد كان واقف وعم يتكتك من بردو، ليش أنت صوتت
لحازم؟ قللي لأ. طيب، وصوتو حلو دخلك؟ قللي ما بعرف، طيب، ليش مبسوط هالقد؟ قللي:
شوبيعرفني شفت هالناس طالعة طلعت معهن، طيب وليش ما شفت البرنامج؟ قللي وهو معصب:
إي شو حبيب عم تجدبا، ليش وين في كهربا لحتى نشوف البطيخ؟ حل عنا خلينا مبسوطين،
بيعرف يغني وإلا ما بيعرف، شو دخلنا، على أساس صاحبك كتير خرجو يصير رئيس بلدية مو
رئيس جمهورية مثلاً…. وليييييييييي، طرت طيران، أكلناها، الزلمة طاقة فيوزاتو
وما حدا مسمي عليه.

واحد سوري