صدى الشام موقع يهتم بما وراء الحدث
صدى الشام/
(نقل مباشر من كواليس تعيين عماد خميس)
-آلو عماد خميس
-نعم مين معي،
-معك المساعد أبو حسين
-أهلاً سيادة المساعد
-اسماع، هلأ بتلبس الطقم الأسود اللي إجاك هدية من أبو فيصل صاحب الفيلا اللي بدروشا اللي عفيتو من فواتير الكهربا المتأخرة عليه، وتحط الكرافة العنابية اللي هداك اياها معاون وزير الصحة لأنك وافقت تمدولو خط ثري فاز على مزرعة عمو والصباط اللي جابلك إياه من فترة واحد من المهندسين بالوزارة منشان تطالع قرار تعيينو مدير قسم، وتحط من العطر اللي جابتك اياي مرتك من خمس سنين لما صرت وزير..
-إي خير سيادة المساعد، في شي؟
-لك اسماع لسه ما خلصت
-حاضر على راسي
-شو كمان يا أبو حسين؟؟ لك العما ضربك والله نسيتني، إي إي تذكرت، خلي الشوفير يفتحلك الباب وإنت طالع.
-الشوفير؟
-إي الشوفير
-والله صعبة سيادة المساعد، لأنك بتعرف إنو الشوفير من طرف المساعد أبو علي الله يحفظو، وأنا بصراحة ما بقدر اطلب منو هيك طلب، خاف يزعل أبو علي…
-إي إي فهمت عليك، بسيطة أنا بحكي مع هالحيوان الشوفير، بس زكرني شو كان اسمو؟
-اسمو الاستاز غسان
-إي والله اتزكرتو، غسان، بسيطة بسيطة، بس انت فهمت علي شو لازم تعمل؟
-إي ولو سيادة المساعد، لح البس الطقم الأسود تبع أبو فيصل، وحط الكرافة تبع المهندس، والبس الصباط اللي هداني اياه معاون وزير الصحة، وحط من العطر اللي جابتلي اياه مرتي.
-لك لأ مو هيك تلبس الكرافة تبع معاون الوزير والصباط تبع المهندس.
-إي إي ما تواخزني والله خربطت، بس ما فهمت ليش كل هالإجراءات؟ خير المعلم أبو يزن طالبني شي؟
-لك لأ، شو المعلم فاضيلك.. نحن يا فهمان حطيناك رئيس وزراء……
-على راسي معلم الله يخليلنا اياك وما يحرمنا منك…
……. إي وهيك شي يعني….
