صدى الشام موقع يهتم بما وراء الحدث
مذيعة: مشاهدينا الكرام
أهلاً بكم هذا موجز لأهم الأنباء، قال المبعوث الأممي ديمتسورا
مخرج: وقفي شوي، اسمو
ديمستورا، مو ديمتسورا
مذيعة: بالله عنجد، والله
كنت مفكر إنو عم يمزحوا معي لما قالولي اسمو دي مستورا يا مستورة.
مخرج: هيك لكان لا ما عم
يمزحوا حبيبتي، اسمو ديمستورا يا مستورة
مذيعة: لا تضحكني انت كمان،
هلأ بغلط مرة تانية
مخرج: لا يستر عرضك لا
تغلطي، خلصينا بدنا نروح، لك والله الحمد لله ما عم نطلع هوا كنا أكلنا هوا، الله
يرحم أبوك ياللي خليتنا نسجل النشرات تسجيل.
مذيعة: إي عنجد، تخيل لو
كنا ع الهوا، وقلت اسمو غلط، والله ليضحكوا علي الناس.
مخرج: هلأ يضحكوا عليكي
الناس مو مشكلة، بس رح يطبشوها براسي، وبعدين بتحول لدبس بندورة
مذيعة: طيب دي متسورا.
مخرج: مستورا، مستورا
مذيعة: ماشي مستورا، بس
دخلك لشو عاملينلو كل هالعجقة، بكرا متلو متل غيرو، بيطلع متآمر؟
مخرج: إي بعرف رح يطلع
متآمر، بس لهلأ ما إجانا توجيه بهالخصوص، لأنو لساتو صاحبنا وفهمان شو بدنا، بس
يطلع متآمر ساعتها قولي متسورا قولي مكسورة، ان شاء الله تقولي سنغافورة، ما حدا
رح يزعل منك.
مذيعة: إي أمري لله،
متسورا، متسورا
مستورا يا مستورة فضحتينا.
