بالسوري الفصيح

من كام يوم وأنا محتارة، الولاد بلشوا يبردوا بالليل وأنا مو عرفانة منين بدي جيب بيدونين مازوت منشان شعل الصوبيا، والله عم يبردوا شو بدي ساوي، حكيت مع أخي صلاح قللي رح يدبرلي شوية مازوت، بس رحت لعندو المسويات لقيت الصوبيا عندو مو شاعلة، سألت مرتو ليش مو مشعلين الصوبيا قالت لي: ما عنا مازوت، استحيت وما عاد سألت أخي عن المازوت، فتحت التلفزيون لقيتهن عم يحكوا عن الصمود بمواجهة المخططات وما بعرف شو، إي بس هالصمود دخيلكن بيقدر يشعلو الصوبيا، ويدفّي الولاد؟ ما بيقدر. جارتنا جوزها مساعد أول بالجيش عبولها برميلين، كانوا ولادي واقفين ع الشباك وعم يتفرجوا، ناداني محمد ابني قللي تعالي إمي شوفي عم يعبوا لجيرانا مازوت، شديتو من أدنو، وقلتلو: اخراس بلا ما يتهمونا بالتآمر ع الوطن، الولد عصب، وصار يصرخ: إمي شوهالوطن اللي بنضل بردانين فيه؟ مو حاجتنا برد والله رح نتجمد، يا ربي شو بعملو لهالولد لسانو متبري منو؟ وزير النفط قاعد ببرنامج ع التلفزيون ما شاء الله عليه وعم يحكي عن “حلول مرتقبة” حدا يخبرو لهالمنظوم إنو الحلول تبعو لازم تكون بهالشتوية لأنو الولاد يمكن يصيرلن شي، يعني المازوتات ما بيفيدونا بالصيف حضرة الوزير، عرفت شلون حضرتك، نحنا بدنا إياهن هلأ.

من كام يوم حملت البيدون أبو الخمس لتورة ونزلت ع الكازية ووقفت بالدور، صارت الساعة تسعة ونص بالليل وما كان يجي دوري، كان في قدامي لسه شي خمسين واحد، حملت حالي ورجعت ع البيت لأني خفت يوقفوني ع الحاجز، كانوا الولاد متغطين بالبطانيات ونايمين، وكانو عظامي عم يطقطقو من البرد، حطيت بالدبو شوية مي وقلت لحالي بلكي بتشعل الصوبيا، بس ما شعلت، يا الله ليش المي ما بتدفي؟ والله رح نموت من البرد.

وحدة سورية