صدى الشام موقع يهتم بما وراء الحدث
انت مع الضربة ولّا ضد الضربة؟
ضربة شو؟
الضربة تبع داعش
اي شوبها؟
اي شو شوبها؟ انت مع الضربة ولا ضدها؟
لأ أنا مع السيادة الوطنية
بالله شو؟
إي والله العظيم
طيب، بس السيادة الوطنية مع الضربة.
شو هالحكي؟
إي متل ما عم قلك، السيادة الوطنية قالوا إنهن كلن مع الضربة، ومن يومين تلاتة وزير المصالحة الوطنية قال إنو الضربة عم تحقق أهدافها، وعين الله عليها.
لك كيف هيك؟ مو كانوا يقولوا إنهن ما رح يسكتوا على أي اعتداء ع السيادة الوطنية؟
شو شكلك مو عايش بهالبلد، شو ما عم تشوف أخبار؟
لا والله، لأنو ما عم تيجي الكهربا عنا بالمرة.
إي اسماع لكان، قال هادا يا سيدي طلعت السيادة الوطنية شغلة تانية غير اللي كنا بنحكي عنها، يعني مثلاً السيادة الوطنية فيها تجلي الجليات، وفيها توصل مرة المعلم ع الكوافير، وفيها تنطر الولاد وتلعبهن لما بيرجعوا من المدرسة، وفيها كمان تشتغل بمزرعة المعلم.
لك شو هالتخبيص، انت عم تحكي عن عسكري بالجيش، مو عن السيادة الوطنية.
لك ليش شو الفرق، مو العسكري رايح يخدم الوطن، شلون بيصير يخدم المدام؟ ونفس الشي السيادة الوطنية معمولة للوطن، مو لصاحبنا، يعني المهم رقبتو بخير، بقى ما قلتلي انت مع الضربة وإلا مو معاها؟
عمي حل عني حكيك بيودي ع المشنقة، قال ضربة قال، ضربة تخلع رقبتك ورقبتو.
(واحد سوري+واحد سوري- السيادة الوطنية)
