صدى الشام موقع يهتم بما وراء الحدث
خيو تعا نحكي كلمتين على رواق
إيييه على أيام الرواق زكرتني بياسر العظمة، خدلك شي سيجارة واقعود لنتفاهم
اي اقعود لنتفاهم
على شو؟
اسماع حبيب، هلأ انت مع النظام وإلا مع المعارضة؟
أنا… بصراحة لا مع هدول ولا مع هدول
لكان مع مين حضرتك؟
مو مع حدا، أنا زلمة لا بفهم بالسياسة، ولا إلي علاقة بشي، ماشي الحيط الحيط وبقول يا رب الستر
أيواااااا، طيب انت بتشوف الدنيا وإلا الجزيرة؟
لا الدنيا ولا الجزيرة، أنا بشوف سبيس تون، لأنو ولادي بيشوفوها، وبشوف فتافيت لأنو مرتي بتحب الطبخ
ها ها، يعني ما بتشوف تلفزيون، طيب ما بتقرا جرايد؟
هههههه جرايد شو إنته التاني، أنا يادوب عم اوصل على بيتي مهدود حيلي بحط راسي وبنام، قال جرايد قال؟؟
طيب، شو بتعمل بهالحياة؟
منيح انك سألتني، أنا بوقف من تمانية الصبح لتلاتة الضهر ورا الصندوق بالجمعية الاستهلاكية اللي بشتغل فيها، وبعدين من التلاتة ونص لنص الليل ورا الدركسيون بالتاكسي، برجع ع البيت باكل لقمتين وبنام.
بالله شو؟ لكان ليش اعتقلوك شهرين؟
ما بعرف
إي حاجتك بقا قال ما بيعرف.
والله عنجد ما بعرف، كنت واقف ع الحاجز، قللي العسكري انزيل نزلت وقف هون وقفت اطلاع بالسيارة طلعت، وبعد شهرين طالعوني، وقال تشابه أسماء.
شو؟
متل ما عم قلك، أنا اسم إمي نجلا، وهني عم بيدورا على واحد اسم أمو رجاء، بس اسمو بيشبه اسمي.
وقعدت شهرين لحتى عرفوا إنو اسم إمك غير اسم أمو.
لك لأ، هني عرفوا من أول يوم، بس…
بس شو؟
قال خلوني موقوف، لأنو مو حلوة اطلع تاني يوم، يعني مو منيحة منشان سمعة المحل.
لك محل شو إنته التاني، إنته كنت معتقل مو هيك.
وبمنفردة الله وكيلك، وأكلت أكل لفرقت.
طيب ليش، مو عم تقول عرفوا من تاني يوم؟
إي والله، بس هني هيك، هاي شغلتهن، ضرب وتعزيب، وشبح، ومسبات، بس عادي، بعدين بتطلع وبتبصم، وما في شي صار.
لك العما ضربك، وكيف مانك مع حدا، قال لا مع هدول ولا مع هدول.
لك وطي صوتك، لح تفضحنا أنا عم زبط وراقي بدي اطلع برات البلد، قال بلجيكا عم تاخد لاجئين، بروح ويصطفلوا، هدول مع هدول، أنا ما دخلي.
لك والبلد؟
هههههههههههههه صباح الخير، قلتلي نتفاهم ما هيك؟
(واحد سوري+واحد سوري والاتنين فهمانين كل شي)
