بالسوري الفصيح

إي خيو من أولها لا تكزب علي ولا بكزب عليك، كل واحد
فينا بيحب بلدو على كيفو، بس إنك تيجي، وتعلّمني كيف حبها لبلدي؟ فهاي بعيدة عن
شواربك، لأنو هاي بلدي، عرفت شلون، ماتواخزوني فتت هيك متل القطار، بس عن جد هادا
المدعو فيصل عبد الساتر حرقلي أعصابي، من كم يوم ع قناة المنار كان عم يعطي دروس
للسوريين كيف يحبوا بلدهن، قال إنو نحنا لازم نحمد الله إنو نحنا سوريين، وإنو
قيادتنا وطنية وشريفة، وشوي تاني كان رح يقول مخلل بيتنجان، اسماع عبد الساتر
أفندي، نحنا ولاد سوريا، يعني لا إنت ولا عشرة متلك بيطلعلهن يحكوا عن بلدنا،
ويتفلسفوا على سمانا، ومنشان حضرتك تفتح عيونك شوي ترا مو نحنا اللي خربناها،
صاحبك أبو رقبة وصاحبك التاني أبو نص لسان هني اللي خربوها، نحنا كان بدنا ياها
تصير أحسن بس صحابك خربوها، ومتل ما بيقول المتل المصري خربها وقعد على تلها، ما
شفتو لصاحبك أبو رقبة كيف مبسوط وهو عم يتأتأ ويضحك وكأنو اللي صاير بسوريا صاير
ببلد تاني، روح قلو لإلو يستحي على دمو شوي، ويحبها للبلد، العما هلأ أنا ليش
تورطت وفتحت على تلفزيون المنار، شو كان بدي بهالصرعة، أصلاً أنا كل ما بفتح على
هالقناة بيرتفع ضغطي، بس خرجي الله لا يقيمني، مو لازم أتعلم من كيسي، وبعدين
الدكتور نصحني اتجنب شوف الميادين لأنو غسان بن جدو وجماعتو بيعملولي حساسية،
ونصحني ما شوف المنار أبداً لأنو الشعار تبعها بيرفع ضغطي، ومسحلي من التلفزيون
بالمرة قنوات الممانعة والصمود، لأنو هدول من أول صباح الخير لحتى تصبحون على خير،
ممكن يسببولي جلطة، أو سكتة أو كريزة رمل بأحسن الحالات، هلأ ولأني كنت متدايق
كتير قمت قلبت من المنار ع الميادين إي شو هاد، شي مو طبيعي، عنجد هالغسان بن جدو
واحد زعبرجي هلأ ترك كل شي وعلقان بغزة، إي طبعاً مو على أساس هو جوز خالة
المقاومة، وعلى أساس إنو أهل غزة واقفين بالدور ليتابعوا قناتو الغبية، لك اتركهن،
حل عنهن للجماعة بيعلموا ألف واحد من شكلك الصمود والمقاومة فلا تتفهمن عليهن، بس
إنو كيف خطرلي غير المحطة على قناة من تبعات إيران عنجد ما بعرف بس والله أعلم
بالغلط، المهم شو شفت يا حزركن، إي اسمعوا قال الجماعة عم يحاكموا يزيد بن معاوية،
والله ما عم امزح عنجد قال عاملين محاكمة وجايبين واحد مغطي وشو، وقال هادا سبب
الفتنة، وهو عم يعترف وندمان يا سيدي ندمان، وتخيلت إنو اللي عم بيحقق معو هو علاء
الدين الأيوبي، وضحكت وأنا قاعد بالصالون وأجت مرتي لتشوف شو اللي عم يضحكني،
وعنجد استغربت كتير، لما شافتني حاطط على قناة الكوثر وعم اضحك، قال عم يحاكموا
يزيد إي أهلين، بس بتعرفوا أكتر شي ضحكني شو هوي، قال يزيد بيتحمل مسؤولية كل شي
عم بيصير هلأ، لك وبدكن ياها تزبط، إي عنجد صعبة كتير إنو تزبط.

واحد سوري