بالسوري الفصيح

شي مية صورة وتعليق نزلت بهالكم يوم، وكلها عم تحكي عن زواج مصطفى الخاني الممثل وبنتو لبشار الجعفري الممثل كمان، يعني زفاف فني برعاية مفتي الجمهورية، العريس ممثل فاشل صار بين ليلة وضحاها متل ما بيقولوا فنان كبير، تماما متل ما صار غسان مسعود ممثل عالمي لأنو طلع بدور كومبارس بفيلم قراصنة الكاريبي، وصاحبنا النمس هيك صار معو، قال عمل دور استثنائي بباب الحارة، وبعدين صار يغني ويرقص، ويعطي الناس دروس بالوطنية، وشوي تاني رح يصير رمز من رموز النضال الوطني، وأما أبو العروس فهو ممثل فاشل بس بالأمم المتحدة، لأنو كل ما طلع بيقرفوا الناس، وبزامناتو مندوبة أميركا حملت حالها من جلسة مجلس الأمن بسبب طريقتو بالكلام، وقالت عنو إنو مو عرفان شو عم يحكي، طبعاً هو تبع قصائد نزار قباني، وهو اللي طلع يحكي عن خان العسل لما كان الكيماوي نازل متل المطر ع الغوطة، غير مندوبين طلعوا يبكوا على بلادهن اللي دمرها الديكتاتور، حدا متذكر مشهد مندوب ليبيا عبد الرحمن شلقم لما طلع يبكي ويقول للعالم انقذوا بلادي التي يريد الطاغية تدميرها، بيوميتها كان شلقم بيمثل الشعب الليبي، أما الجعفري أبو العروس فبيمثل النظام وبيمثل بشار الأسد فقط، هلأ ما بدنا نحكي عن دور بنتو شهرزاد اللي بتقول الرسائل المسربة إنو هي ورا كتير من المصايب اللي عم تصير بالبلد، وهي صاحبتو لبشار الأسد، وبتبعتلو رسائل غرامية، وهي ولونا الشبل وما بعرف كم وحدة كمان بيديروا البلد وبيشغلوا اللي بدهن اياه، وهني متل مو كاتب واحد ضراير أسماء خانم، ولأنو كل شي وارد ببلدنا اللي ما عاد بلدنا، فمو بعيدة بيطلع مذيع بنشرة الأخبار ليعلن تكامل اللحمة الوطنية من خلال هذا الزفاف المقاوم، ومو بعيدة كمان يروح العريس ليقضي شهر عسل هو وعروستو بمعاقل المقاومة تبع حسن نصر الله، وهونيك رح يصير العرس عرسين، ومو بعيدة كمان رجال الله يخبطولن شي صاروخين على عرسال وبيقولوا إنهن عم يتصدوا للمؤامرة الكونية اللي بتستهدف قلعة الصمود والتصدي، كل شي وارد ببلد رئيسو بشار الأسد، عرفتوا شلون بلد رئيسو بشار الأسد في أسوأ من هيك آخرة يا فاخرة؟ والله ما في، ولا رح يكون في. سامحونا.

واحد سوري