بالسوري الفصيح

بعد كم يوم بيخلص رمضان، إن شاء الله كل عام وأنتو بخير،
ويخلصوا المسلسلات كمان، شون ناويين تعملوا بعد ما يخلص باب الحارة وبقعة زيت، عن شو
ناويين تحكوا؟ يا شباب ويا صبايا الفيسبوك؟ بس ما تقولولي رح ترجعوا تحكوا عن
الثورة، الله يرضى عليكن، مو حلوة، صار لكن أكتر من شهر نسيانين الموضوع، بقلكن من
إيمته من لما بلش كأس العالم، من هداك اليوم وبعدين إجتكن مسلسلات رمضان وبلشتوا
تقريق وتقفيل، وبيني وبينكن أنا محسوبكن، كنت متابعكن واحد واحد ووحدة وحدة، قريت
كل شي كتبتوه، إي شو يخزي العين كأنو ما عندكن لا شغلة ولا عملة غير رونالدو وأبو
عصام، وشو اسمو النمس، وأوزيل، لك على قد ما حكوا عن أوزيل صرت حسوا واحد بباب
الحارة بس ابن أختي الله يرضى عليه قللي لا يا خال هادا لاعب ألماني، ألماني وإلا
تايواني شو دخلنا المهم حبيت خبركن منشان ما تتفاجأوا بالأخبار اللي صارت، لساتو
النظام عم يقصف إيمته ما بدو ووين ما بدو، ومنشان ما تبكوا أو تزعلوا، بحب خبركن
إنو بشار الأسد قال عنكن إنكن شعب قليل الترباية، يعني عدم المؤاخزة من حضراتكن يا
صبايا ويا شباب طلعتو قليلين أدب، يعني شبعانين خبز مو شبعانين ترباية، يا عيب الشوم
عليكن، وبحب خبركن إنو داعش خربت كل شي، وما بقى عنا لا ثورة ولا غيرو، صارت القصة
كلها كيف بدنا نخلص من داعش ومن النظام، هي عم خبركن يعني بوستاتكن الله يرضى
عليكن لازم تكون مزبوطة ومرتبة، يعني احكوا عن الاتنين، منشان ما يقولوا عنكن
الناس العما وين كانوا هدول، على فكرة ما بقى في إعلام للثورة، عن جد خلص، ولا
تلفزيون واحد فيكن تشوفوا عليه أخبار الثورة، بقى الله يرضى عليكن شغلولي حالكن
شوي وارجعوا على الانترنت دوروا هون وهون لبين ما تلاقوا الأخبار، لأنو خلاص بح،
ثورة ما بقى في، صار الشاطر يقول أنا ما دخلني، ويروح بالليل يبايع الدولة، أو
يرجع ويقعد تحت سقف الوطن، والله ما عم أمزح معكن، كتار من المعارضين رجعوا ليقعدوا
تحت سقف الوطن، ويعملوا أحزاب معارضة جوات الوطن، بس شو بدها تعارض لا حدا يسألني
لأني بستحي قلكن، إي المهم، منشان ما أنسى ترا لسه في جيش حر إزا بدكن تحكوا عنو
لأنو هادا الوحيد اللي صفيان عنا، هو الوحيد اللي لسه عم يحلم، بس هالشباب
القبضايات عم يحاربوا كل شي، النظام من هون وداعش من هون، لك بيسكروها من هون
بتفتح من هون، الله يكون بعونهن، وبتعرفوا شو كمان، الناس ما حست بغيابكن، يعني
بصراحة بصراحة ما حدا أسفان لأنو ما عاد شاف تعليقاتكن وبوستاتكن، لك ولا حتى
لايكاتن وصوركن وإنتو عم تأركلوا بشي مكان، خلاص الناس ما بقى اشتاقولكن، وإن شاء
تشتاقلكن العافية، لهيك أنا حبيت خبركن منشان ما تتفاجأوا، بس وبرضايي عليكن أنا
متل عمكن لا ترجعوا تعطونا حكم ومواعظ، نحنا السوريين قلبنا من الحامض لاوي، ما
بقى نستحمل تعبنا، وعم تطلع روحنا باليوم
الواحد عشر مرات إذا مو أكثر، شو رأيكن بهالتفاصيل، منيحة مو هيك؟ بعرف إنها
منيحة، وبعرف إنو متل إجركن كل شي حكيتوا بس أنا كمان متل إجري، لك ولإجري.

واحد سوري