بالسوري الفصيح

هلأ في مجنون بيحكي وعاقل بيسمع، وفي عاقل بيحكي ومجنون بيسمع، بس لما يكون في مجنون بيحكي ومجنون بيسمع ساعتها قولوا ع الدنيا السلام. طبعاً لا حدا يفكرني عم وزع حكم عند الصبح، بس عنجد كيف خطرلوا للشو اسمو إنو يعمل انتخابات مجلس شعب؟ يا أخي والله فهمنا انتخابات رئيس، أمنا بالله ما في مشكلة، بس مجلس شعب، والله هاي كبيرة. بشرفي ما عم امزح ما عم تنبلع معي أبداً. طيب مو أول شي ليكون في شعب، وين الشعب؟ طيب في مليونين ونص بتركيا، وحوالي مليونين بالأردن، ومليون ونص بلبنان، قديش صاروا، مزبوط خمس ملايين ونص، طيب وحط عليهن نص مليون شي بالجزائر وشي بمصر وشي بالسودان، صاروا ست ملايين، يا سيدي ومليون بالخليج ما رح نقول أكثر، قديش صاروا سبع ملايين مزبوط؟ طيب والرقة والدير وما بعرف شو كمان تحت سيطرة داعش، وإدلب وريف حلب ونص ريف دمشق تحت سيطرة الجيش الحر وكتائب تانية، خلينا نقول صاروا صارلولهن شي عشر ملايين، طيب مين بقي؟ عشر ملايين، مو هيك وإلا أنا غلطان؟ طيب والألعن من هيك إنو في ناس مرشحين حالهن عن الدير والرقة وإدلب، والله ما عم زل عليكن، طيب كيف بدها الناس تنتخبهن هدول؟ معقولة يعملوا اتفاقية مع الدواعش منشان الاشراف ع الانتخابات بمناطق سيطرتها؟ هلأ هني بيشتروا من داعش نفط ما اختلفنا، بس يا حبيبي إذا عملوا اتفاقية منشان الانتخابات، والله شي حلو. عنجد، وبيقولوا ع التلفزيون هذه الانتخابات برعاية داعش، ديمقراطية على منهاج الما بعرف شو… أوكي بعرف إنو كلامي متل كلام المجانين، بس بشرفكن اللي عم يصير مو شغل مجانين؟؟

واحد سوري طقوا فيوزاتو