بالسوري الفصيح

ما لقيت حدا يفهمني شو يعني هدنة، عنجد كل ما بسأل حدا بيقلي يعني لح يوقفوا إطلاق النار، طيب، برجع بتفرج ع التلفزيون تبعنا انتو اكبر قدر، بلاقيهن عم يحكوا شي تاني، يعني الجماعة مستمرين بمحاربة التنظيمات الإرهابية، وأنا اللي بعرفوا انو هني بيعتبروا كل السوريين إرهابيين. طيب شلون بدهن يوقفوا إطلاق النار، وشلون بدهن يستمروا؟ ما حدا لح يقدر يشرحلي هالمصيبة اللي أنا واقع فيها غير عمنا خالد العبود، لأنو الزلمة متل ما بتعرفوا فيلسوف عصرو وزمانو. ماشي، دورت ع الاستاذ خالد بين الفضائيات ولقيتوا بالصدفة ها، على تلفزيون سما، وبصراحة متل ما توقعت تماماً عند خالد الخبر اليقين، حكي حكي شي ساعتين إلا خمس دقايق، قال الروسي ضغط ع الأمريكي لحتى يقبل الهدنة، قام الأمريكي ضغط ع التركي لحتى يوافق، والسعودي والقطري وافقوا لأنو بيسمعوا كلام الأمريكي، بس الروسي عندو شروط. ماشي، كيف بيقنع الأمريكي بالشروط، لازم يقدر يحطو بالزاوية، منشان هيك الروسي حط الأمريكي بالزاوية، وخلاه يوافق على انو داعش والنصرة ما بتشملهن الهدنة. حلو، بس الاستاذ خالد بهالعجقة كلها ما خبرنا مين اللي ضغط على معلمو لحتى يقبل بالهدنة، مع إنو معلمو ذات نفسو قال إنو الهدنة هي خطة سعودية تركية لإنقاذ العصابات الإرهابية. يعني معقول معلمو يكون بيعرف هالحقائق كلها، وبعدين يركض ركض ويوافق ع الهدنة؟ مين أمروا يوافق؟ بالله عنجد خبرنا مين؟ الله يخليك بما إنك عبقري زمانك وفايت طالع على ملفات الأمريكي والروسي والبلجيكي يخزي العين كأنك قاعد معهن بقاعة الاجتماعات، وكأنو لافروف قبل ما يحكي أي كلمة يسألك. لك حبيب سمعت شو حكى مندوب روسيا تشوركين؟ سمعت والا ما سمعت؟ طيب شو رأيك تسد نيعك وتخرس، وحاجة تحكي ع القرار السوري، والسيادة السورية، يعني بيني وبينك شكلك كتير بايخ وانت عم تقول السيد الرئيس، رئيس على مين فيك تخبر الأخوة المشاهدين؟ ورصاص….

واحد سوري