بالسوري الفصيح

يا جماعة الخير والله رح يطق عقلي، بشرفي ما عم أمزح بس والله ما بقى قدران افهم شي، بجيبا يمين بتجي يسار بطالعها لفوق بتنزل لتحت.

 العما شي بيجنن، إنو شو هاللحمة الوطنية اللي صرعونا فيها؟؟ صرلون أكتر من تلت سنين، إي يحرق حريشهن كل ما بنزل ع السوق بسأل اللحام بقلوا حجي عندك لحمة وطنية بيقلي بلدي حبيب، بقلوا: لأ بدي وطني بيطلع عليّ من فوق لتحت ويتركني واقف، حدا بيعرفلي وين بتنباع هاي اللحمة الوطنية، لك العما ع التلفزيون من الصبح للمسا بيقولوا بدهن يحافظوا عليها، وإنو هالناس اللي عم تموت كل يوم كلهن فداها، وتصريحات وخطابات ومحللين انتو اكبر قدر، وشي من الشرق وشي من الغرب، كلوا بيحكي عن اللحمة الوطنية، بس والله ما عم نلاقيها بالسوق، لك وحياة جوز خالتي ما عم زل عليكن كل يوم بنزل وبسأل وما بلاقيها، لك ما يكونوا جماعة التلفزيون ما بيعرفوا إنو اللحمة الوطنية تهربت لبرا، إي لبرا متل كل شي، حدا يخبرهن حرام، بلكي يلاقوا شي شغلة تانية بيحكوا عنها، مو حلوة بحقهن، والله عنجد، قال لحمة وطنية قال، كلوا بلدي عمي، ليش في أحسن من البلدي؟

واحد سوري