صدى الشام موقع يهتم بما وراء الحدث
– شو صار ما صار؟
– والله ما صار شي، لسه كل شي على حالو، الحمد لله المؤامرة خلصت وما بقى غير عضة كوساية، وتخلص
– إي شو عضة كوساية إنته التاني، صرنا آكلين شي ميتين كيلو كوسا وفوقهن شي تلاتميت كيلو بيتنجان ولسه بتقللي عضة كوساية.
– لا يا حبيبي مو أنا اللي عم قول، هنن عم بيقولوا
– مين هنن بلا صغرة؟
– هنن ع التلفزيون، ليش ما سمعت شو قال سيادتو من كم يوم؟
– لا والله ما سمعت لأنو الكهربا إلها شهر ما إجت عنا، وما عم نشوف تلفزيون.
– إي اسماع لكان، سيادتو قال إنو بالكتير بالكتير، آخر هالسنة بيكون كل شي خلص، وما بقى في طيخ طاخ، وكل شي رح يرجع متل ما كان.
– بالله شو؟
– إي والله متل ما عم قلك. وكمان سيادتو بعتلو للرئيس الروسي بوطين رسالة قلوا فيها ليك حبيب أنا ماني صاحبك تبع أوكرانيا، ما رح اترك سوريا واهرب لو شو ما صار.
– بالله هو هيك قال، طيب وليش مين قال لسيادتو إنو الناس بدهن ياه يهرب، ليش هوي ما سمع شو قالوا، قالولو لا تروح نحنا جايينك.
– إي صحي والله مزبوط زكرتني، مزبوط، بس مو كأنو تأخرو؟
– مزبوط تأخروا، بس في قناة ثورية عم تقول إنو خلص، الشغلة بدها عضة كوساية، صحي المجتمع الدولي مو فارق معو، والدول العربية عم تتفرج، ونص السوريين صاروا مشردين، بس هاي القناة الثورية طمنتنا، عضة كوساية، وكل شي بيخلص.
– لك العما على هالقصة كمان عضة كوساية، يا خوفي ما بيبقى في كوسا على قد ما عضينا، قوم خلينا نلحق حالنا ونجيب كم كيلو قبل ما تخلص من السوق.
(واحد سوري+واحد سوري)
