بالسوري الفصيح

شوفوا حبيباتي صرلنا تلت سنين عم نسمع أخبار، شي من
هون وشي من هون، ما ضل حدا بالدنيا كلها ما حكى علينا، والناس عم يتدايقوا منا،
ووين ما رحنا بنسمع ناس بيقولوا سوريين!! وبيحطوا بعدها شي ميتين إشارة تعجب، لأنو
نحنا قال شو كنا عايشين مرتاحين ومو ناقصنا شي، إي بالله شو؟ عن جد؟

شوفوا حبيباتي، نحنا كنا مرتاحين كتير،
ولييييييييييييه شو مبسوطين، يعني كنا عم نموت من البسط، عنا ممانعة، وعنا مقاومة،
وعنا الثيّد الرئيث، عرفتوا شلون، كل هدول الشغلات كانوا عنا، بس كان بدنا شوية
كرامة، مو تبع دريد لحام، لأ الكرامة تبع غياث مطر، وحسين الهرموش، ويحيى الشربجي
ورزان زيتونة وخليل معتوق، عرفتوا شلون، ولهيك يا حبيباتي اللي ما عندكن جنس
الكرامة، نحنا بدنا نضل مكملين، وعيشوا إنتو وانبسطوا، إن شاء الله الحمّى تسلق
بدكن سلق، العما شو مبسوطين.

واحد سوري بس معصب هالمرة