صدى الشام موقع يهتم بما وراء الحدث
امبارح فتت ع البيت لقيت مرتي عم تتفرج ع التلفزيون على قناة تلاقي ما
غيرها، واحزروا شو كان عنوان البرنامج اللي كانت عم تشوفوا، قال: كيف تحافظين على
زوجك؟ إي والله عن جد، ومرتي من كل عقلها عم تشوف وتسمع هالخبراء والمختصين وأصحاب
التجارب وهني عم يحكوا، وقال شو الابتسامة والكلام اللطيف، وهيك شغلات يعني. المهم
خلص البرنامج وأنا قاعد بالمطبخ عم اسمع الأخبار، إجت مرتي وهي عم تضحك وقالت لي
لك هالجماعة عن جد قاعدين بكوكب تاني، من دون ما أسألها عرفت إنها عم تحكي عن
التلفزيون، قال شو صارلن ساعتين عم يحكوا عن الزواج والأسرة والزوجة الصالحة وما
خلوا واحد ولا وحدة ما سألوه وطلعوا بنتيجة إنو التفاهم بين الزوجين بيقوي الزواج
وبيحافظ ع العلاقة الزوجية، إي طيب ماشي صدقنا هالحكي، طيب إذا الزوجين تفاهموا
ومشي الحال، وطلع هالزوج لحتى يجيب خضرة ووقفوه ع الحاجز وأخدوه وما عاد رجع، وضلت
هالزوجة عم تستناه سنة سنتين تلاتة وما كان يرجع، شو ممكن تعمل المخلوقة منشان
تحافظ ع العلاقة الزوجية؟ شلون فيها تتفاهم معو؟ والله ما خبرونا… قال تفاهم
قال… ليش إنتو خليتوا تفاهم، خربتوها وبدكن يانا نتفاهم الله يقصف عمركن وعمر
اللي لساتو عم يتفرج عليكن.
طبعاً ومنشان ما تستغربوا، مرتي كل يوم بتقول نفس الشي، عادي، بتتفرج ع
التلفزيون منشان تسبهن وتلعن أبوهن…
بخاطركن أنا ما حكيت شي…
واحد سوري
