بالسوري الفَصيح

الحمد لله على كل حال، عمتي أخدت لجوء بهولندا، وبنتها أخدت لجوء
باليونان، وعمي أخد لجوء بفرنسا ومرتو وولادو زبطوا لم الشمل ورح يطلعوا بعد كم
يوم، خالاتي تلاتتهن صاروا بالسويد هنن وولادهن، وخالي لساتو بدبي عم يشتغل، بس
هداك النهار حاكاني وقللي إنو عم يفكر يسافر على كندا لعند خالي التاني لأنو خايف يفنشوه
من الإمارات بس يخلص عقدو. خالتي وصلت على إسبانيا من شي اسبوعين وبدها تروح على
ألمانيا لأنو اسبانيا وضعها صعب، ولادها لساتهن بتركيا بس اتفقوا مع مهرب منشان
يطلعوا ع السويد، أخوها لمرتي صارلو سنتين بالدنمارك وبعت ورا أمو وأبوه وراحوا
لعندو، وبنات حمايي كلهن طلعوا هني وجوازهن وولادهن بالبحر وصاروا بالنروج ومشي
حالهن، عمها لمرتي الله يتم عليه، صار بأمريكا هو وعيلتو، ومن فترة بعتلي الف
دولار منشان اعطيهن لأختو منشان تزبط جوازات عيلتها لحتى تسافر لعندو، أبي وأمي
راحوا السنة الماضية ع الحج ولساتهن هونيك عند أختي الكبيرة، ويمكن يروحوا لعند
أخي على ماليزيا، أختي عايشة بمصر من تلت سنين بس الحمد لله اتصلوا فيها السفارة
النمساوية ورح تطلع هي وجوزها وولادها بعد شهرين بالكتير، من يومين كان عندي أخي
الصغير عدنان وقللي إنو زبط أمورو ورح يطلع تهريب ع اليونان لأنو ما عاد قدران
يعيش بهالبلد، حاولت اقنعو يغير رأيو، قلت لو إنو هاي بلدنا ولمين بدنا نتركها
ونمشي، صار يضحك وقللي إنت متأكد إنو هاي بلدنا؟ بصراحة ما عرفت شو بدي احكي، بعد
ما طلع من عندي لقيت مرتي متضايقة كتير، لأ الحقيقة هي كانت معصبة مو متضايقة،
سألتها شوبك؟ شو في؟ قالت لي شو ناوي تساوي؟ بدك يانا نضل قاعدين وشنا بوش بعض، ما
بقي حدا من قرايبنا هون، لك يا رجال ما بقي حدا نحكي معو تلفون، كلهن سافروا
ومبسوطين إلا أنا وياك محتارين كيف بدنا نطعمي ولادنا، وكيف بدنا نبعتهن ع
المدارس، وكيف بدنا ندفيهن، لك يا رجال ما بقي غير حميدان بالميدان.

بصراحة أنا ما عرفت مين حميدان، بس والله معاها حق.

واحد سوري