بالسوري الفَصيح

–امبارح اتصلت فيني حماتي
وقالت لي تعال وجيب مرتك، قلت لحالي الشغلة فيها غدا، وضليت طول الطريق عم اتخيل
المحشي واليبرق واللزي منو، وشي إني وصلت ع البيت لقيت مرتي لابسة وجاهزة لأنو
حماتي متصلة فيها، طلعنا بهالسرفيس وكان حاطط على أزاعة شام إف إم، وكان في صوت
وحدة عم تقرا شعر، إي شو شعر يخزي العين شو حبيت الشام من ورا حكياتها، شي ياسمين
وشي بردى وشي وشي، عن جد شيب يفتح النفس، المهم وبلا طولة سيرة وصلنا لعند بيت
حماتي المغرب مع إنو نحنا طلعنا من البيت الضهر، بس وقفنا بهالمشوار على شي خمسطعش
حاجز، وكلهن عملوا الواجب معنا نزلوننا فتشونا، شافوا هوياتنا، زورونا، بهدلونا،
وهيك لحتى انسدت نفسنا أنا والمخلوقة وما بقا بدنا لا ناكل ولا نتسمم صار بدنا
نرجع ع البيت بسرعة أحسن ما ننام بالشارع، إي المهم فتحت حماتي الباب وكان لونها
أصفر، ومبين عليها التعب، خير خير مرة عمي، لك منين بدوا يجي الخير، شرفوا شوفوا
وطلعت من درج الطاولة عشر فواتير كهربا كل فاتورة اكبر من التانية، جمعناهن
ضربناهن قسمناهن طلعوا يا مرحوم الوالدين مية وخمس وخمسين ألف، لا بقا فكرت بمحشي
ولا بيبرق، أصلاً ما بقا فكرت بشي اتبلكمت، وما بقا عرفان شو بدي ساوي.

–عنجد عم تحكي؟

–إي والله عنجد

–طيب وشو بدها تساوي
حماتك؟ يعني بدها تدفع الفواتير؟

–لك منين بدها تدفعهن؟ ليش
هي ملاقية تاكل، مو الجماعة قطعولها راتب جوزها التقاعدي لأنو أخوه صار بالجيش
الحر.

–طيب وهلأ شو بدها تساوي؟

–ولا شي بدها تلاقي شي حدا
يدفع الفواتير ويستأجر البيت منها، وهي تطلع تعيش بالمخيمات، هونيك لا بتدفع كهربا
ولا بيقطعوا راتب جوزها، ويا راس مع هالروس.

–بتعرف والله أحسن، أصلاً
آخرتها كلنا لح نعيش بالمخيمات، لأنو الجماعة لسه بدهن يقاوموا المؤامرة الكونية،
وبعلمك المؤامرة الكونية ما بتخلص، لأنها كونية مو حيا الله.