بالسوري الفصيح

صدى الشام/

والله ما كنت ناوي احكي على دراما رمضان لأني ما بشوف تلفزيون من زمان، من لما انقطعت عنا الكهربا من شي خمس شهور واجتنا فواتير ما قدرنا ندفعها، فقررنا نستغني عن الكهربا ونرجع للعصر الحجري، وهيك صار، لأنو نحنا أصلاً بعنا البراد والغسالة والتلفزيون، بس بتعرفوا شو… الشباب اللي كل يوم بيكتبوا بوستات على قديش هني متضايقين من العالم اللي عم يشوفوا مسلسل تافه متل باب الحارة هدول اللي رح يجننوني، لأنو بصراحة بيعرفوا كل تفاصيل المسلسل، وبيعرفوا كل شي صار ورح يصير، وما شاء الله عليهن حافظين الحوارات كلها، و مو تاركين شاردة ولا واردة ما بيعرفوها، وبالأخير يكتبولك حكمة من تبع أصلاً ما بيشوف هيك مسلسلات إلا اللي ما براسو عقل، لك علي الحلال جننتوني، بشرفكن كيف عم تعرفوا هالتفاصيل كلها لو ما كنتوا دبقانين قدام التلفزيون وعم بتابعوا باب الحارة وغير باب الحارة، عنجد عم احكي مو مزح؟ فيكن تقولولي كيف؟ طيب شوفوها نحنا مالنا علاقة بس يستر على حريمكن لا تعملوا حالكن أوادم وبدكن تعلموا الناس شو بيعملوا وشو ما بيعملوا، شو دخلكن انتو؟ خليكن ديمقراطيين حبيباتي، لأنو بصراحة وبكل صراحة كمان باب الحارة متلو متل غيرو، عيارو شهر وبينكب بالزبالة وما بيعود الو قيمة، بس يخلص رمضان بينسوه الناس، بس مين اللي بيستفيد؟ خلوني خبركن: الممثلين والممثلات بس، هدول بيقبضوا مصاري منشان يمثلوا علينا، وشو ما بيعملوا رح يشوفوه الناس، لأنو نحنا متعودين ما ناخد موقف من شي، يعني مثلاً بيعملوا حملة قاطعوا باب الحارة، وبتلاقيهن كلهن بيشوفوا مسلسل طوق البنات أو خاتون، يعني مثل حملة مقاطعة البضائع الأميركية كانوا كل المشاركين فيها بيدخنوا مارلبورو ولما بتسألهن بيقولولك هادا صناعة بلغارية، بالله شو؟

يا حبيباتي يا سوريين، يا حبايب قلبي وين ما كنتوا، معقولة لسه الكن نفس تتفرجوا على مسلسلات؟ معقولة!! لك تزكروا بس انو في ببلدكن مليون شهيد، لك اتزكروا انو نص أهل بلدكن ما عندهن كهربا من أربع سنين، لك اتزكروا انو نص أهل بلدكن ما بقا عندهن بيوت… بس شو بدو الواحد يحكي ليحكي… الله يسامحكن طلعتوني عن شعوري…