بالسوري الفصيح

أنت مو أنت وإنته جوعان، يا أخي يمكن هالإعلان هو الشغلة
الوحيدة اللي إلها طعمة ع التلفزيون، لأنو لما الواحد يكون جوعان ممكن يتحول لكائن
مفترس، وممكن يتحول لواحد تاني تماماً، يعني خلوني احكيلكن شو صار معي وانتو
احكموا… من كام يوم وقفونا ع الحاجز، كنا مزروكين زرك بالميكرو، نزلوا شباب ،
نزلنا، هوياتكن، تفضل، وبلش هالعنصر المحترم يقلب هالهويات على أقل من مهلو، وكان
معصب وطالع خلقو، بيطلع بكل هوية شوي وبعدين يبزور صاحبها زورة من هدول تبع كاشفك،
لحتى ينشف الدم بعروقو وبعدين بينتقل ع الهوية اللي بعدها، مين فلان؟ أنا معلم،
انت شو بتشتغل؟ أنا، معلم صفيحة. صفيحة والله الصفيحة طيبة، ووين محلك؟ محل، والله
ما في محل معلم أنا بشتغل بمطعم بس مو لإلي. إي إي فهمت، طيب ووين هالمطعم؟
بجرمانا معلم. جرمانا أيواااااا، وين بجرمانا؟ عند ساحة السيوف. أيوااااااااا. ساحة
السيوف، طيب وين رايح هلأ؟ رايح ع البيت، خلصت شغل وطالع على بيتي. حلو، حلو كتير،
طيب ما أخدت لولادك شوية صفيحة؟ مبلا، مبلا، ليكن بالميكرو، خليني جيبلك كم قرص
تدوقهن. لك يا زلمة ما في داعي، بس يا الله جيبلك شي كم قرص. إي مو على عيني. وطلع
الشب ع الميكرو، وجاب كيس الصفيحة وناولوا للعنصر اللي تغيرت ملامحو 180 درجة، يا
سلام سخنين، وريحتهن بتشهي، يا سلام شو طيبة، تعا برهان دوق هالصفيحة. وإجا برهان
وما بعرف مين كمان وصاروا يدوقوا ويضحكوا، ونحنا واقفين عم نتفرج، وفجأة انتبه
العنصر الموقر، وقال لشوفير الميكرو انتو ليش لساتكن هون، تعا خود الهويات
وتيسروا، ظريفة هالصفيحة، طبعاً العنصر المحترم ما كمل باقي الهويات، أصلاً و لا
شاف شو في بالميكرو، إي شو تغيرت ملامحو، إي شو انفرجت أساريرو، شي مختلف تماماً،
بعلمك كان مكشر، ومعصب، وبعلمك صار رايق ولزيز متل السفن أب، إي عن جد إنت مو إنت
وأنته جوعان، أنت واحد تاني، شكل تاني، حب تاني. لك ولسه بدكن حرية!!

واحد سوري