بالسوري الفصيح

صدى الشام/

كل الناس أكيد بدهن يكتبوا ويحكوا عن الضربة الأميركية على سوريا، الفضائيات والإذاعات والجرايد، وكلو كلو، وما رح نخلص لحتى يصير شي جديد، وصرت سامعها من أكتر من حدا إنو ما بعد الشعيرات غير اللي ما قبل الشعيرات، وهالحكي صحي مية بالمية، ويمكن أكتر من مية بالمية كمان، بس كمان كل اللي عم يحكوا عم يقولوا ضربة على سوريا مع إنو الضربة مو على سوريا، الضربة كانت على مطار بسوريا الأسد، وهالمطار كانت الطيارات التابعة لبيت الأسد تطلع منو وتضرب سوريا، يعني دخيلكن الواحد بيقدر يفصل وإلا ما بيقدر يفصل، يعني قصدي بيقدر يفصل بين سوريا وبين سوريا الأسد وإلا ما بيقدر، مبلى بيقدر، جربوا تفكروا فيها، هالمطار موجود من ما بعرف كم سنة، وطيارات وتدريب والشباب كانوا يروحوا يخدموا جيش بالمطار، ويتبهدلوا، بس دخلكن شو استفدنا نحن السوريين من المطار، يعني مثلاً لما فاتت الطيارات الإسرائيلية سنة ال 2007 وراحت ضربت موقع الكبر شو عمللها المطار ولا شي، وشو عملتلها الطيارات كمان ولا شي، وبعدين بالألفين وتسعة وبالألفين وعشرة وغيرو وغيرو أصلاً إسرائيل ما شغلتها غير تفوت تقصف بسوريا، وسوريا الأسد تحتفظ بحق الرد، يعني ولا مرة شفنا سوريا الأسد عملت شي شغلة منشان سوريا، وشغلة تانية يعني من كل عقلكن إنو عم تحكوا بالموضوع على أساس إنو الإمبريالية الأميركية ضربت بلد عربي، عم تحكوا جد، شي بيضحك، يعني الاشتراكية الروسية بتفلح بهالبلد العربي صارلها كذا سنة، والمقاومة الإيرانية الحقيرة ما خلت شي ما عملتوا بهالبلد العربي وهلأ حتى نقح عليكن عرق الكرامة العربية، ليش ما حسيتوا بالكرامة لما ماتوا نص مليون سوري، وإلا شاطرين تبيعوا شعارات وأكل هوا، شاطرين تصيروا تابعين لسوريا الأسد، وتتمنوا كل يوم يموتوا كل السوريين وما يبقى غير جماعة سوريا الأسد، يلعنكن انتو وهالوطنية الكدابة، ليش ما حسيتوا بأطفال خان شيخون والغوطة والدير وحمص وحلب، ودرعا، ليش ما حسيتوا بالأمهات اللي ماتوا ولادهن، والولاد اللي ماتوا أهاليهن، بتحسوا بس لما بينضرب شي مطار كان بيقصف الناس على أساس أمريكا الامبريالية ضربت السيادة الوطنية… نحنا بنتمنى إنو ما يضل ولا مطار عسكري بسوريا، لأنو بدنا يكون في مدارس ومستشفيات وملاعب… وبحب طمنكون، هيك مطار بحياتو لا كان رح يحرر الجولان ولا رح يرجع فلسطين، هدا المطار شغلتو الوحيدة إنو يقتل السوريين يا سوريين.