بالسوري الفصيح

صدى الشام/

حكايتنا مع هالفهمان اللي صار بغفلة من الزمان رئيس، بنقدر نلخصها بهالمثل اللي كانوا يحطوه صحاب المحلات، منشان يقولوا للزباين الدين ممنوع، ديناه فرفش، طالبناه طنش، وفينا نقول بدل طنش، جحش، وتوحش، لأنو لما ديناه البلد فرفش وطار عقلو، وصار يضحك متل المسطول، وصدق إنو الشعب بيحبو وعشقان لون عيونو، بس ما كان عرفان إنو الناس كانوا عرفانين إنو العصابة اللي هو منها ممكن تقصف البلد بالدبابات والطيارات، وتخربها على راس الناس لو وقفوا بيوميتها وقالوا ما بنقبل، لهيك قبلوا السوريين وهزوا راسهن، وقالوا معليش نعتبر حالنا عم ندينو لهالبني آدم كم سنة من عمرنا وعمر هالبلد، بلكي هيك الله يهديه ويعمل شي منيح لهالناس، سبحان الله بيقولوا بيخلق من ضهر الفاسد عالم، ويمكن وقتها الناس فكرت إنو مو ضروري الكلب بيخلف جرو، هلأ هالكلام كلو ما لو لازمة بهالوقت، لأنو البني آدم طلع مو بني آدم، ولما طالبناه وقلنالو بدنا حقوقنا جحّش وتوحّش ورجع لطبيعتو الأصلية، متل ما رباه أبوه، بالقلم والمسطرة، لا كلمة زايدة ولا كلمة ناقصة، قصف تفجير تدمير تهجير، متل ما عمل أبوه بحماه، عمل هو بكل سوريا، وصرنا كلنا إرهابيين وعملاء، ولازم نطلع برات سوريا أو نموت، لأنو يا عيب الشوم نحنا بدنا نخرب بلدنا، على أساس هو وعصابتو كانوا معمرينها، ويخزي العين عليها، لك هو صحي الناس كانت عايشة بس من قلة الموت، مو هيك كنا نقول لما حدا يسألنا كيفكن؟ هلأ هو وفرلنا الموت بكل الأشكال، وبدو يانا نموت كلنا ويضل هو قاعد على راس الجبل، متل القرد لأنو سوريا اسمها سوريا الأسد، يعني ملك بيت الأسد…

بيقولوا الكبارية الزمان دوار، يعني بيدور، وبحياتو الزمن ما وقف، بيضل عم يدور، وبيقولوا كمان على الباغي تدور الدوائر، يعني بتدور، ما بتمشي لورا، بتمشي لقدام، وبحياتها الساعة ما بتمشي لورا، وبيقول المثل الشغلة بدها طولة بال، صحي تعبنا ونحنا مطولين بالنا، بس شو عليه، جايينك جايينك… وبدنا نرجع حقنا من رموش عيونك… استنانا، ولا تهرب ع أستانا.