بالسوري الفصيح

صدى الشام/

واحد قبيح شاف واحد قبيح سألو ليش هيك صاير؟ قللو خير شو قصدك؟ قللو ما بعرف حاسك متباشع كتير… قللو التاني: لك يا زلمة أنا وياك بيضربو فينا المثل بالقباحة، فبلاها هالحركات وما تعملي حالك براد بيت… قللو الاول: قولتك هيك يعني… قللو التاني: متل ما عّم حاكيك…

إي وهيك يعني جماعة النظام لما يجوا يتهموا المعارضة بالعمالة للدول الأجنبية بتحسهن هيك عّم يقولولك تعا سبنا… يعني معقولة فيهن يحكوا عن العمالة وهني حولوا سوريا لكراج سيارات عمومي مين ما بدو يتفضل… روسي إيراني لبناني افغاني باكستاني عراقي من كل الموديلات والشكيلات، بتحس حالك فايت على مؤتمر للجنسيات الأجنبية لك شوي تاني رح تبطل تسمع حدا يحكي سوري على قد ما صار في أجانب… وجماعة المعارضة يخزي العين عنهن، شي بيشهي، إنّو كيف مولفين ما بتعرف بيسمعوا كلام الأمريكان والسعوديين والاتراك وغيرهن وغيرهن.. ومانن مستعدين يسمعوا كلام واحد سوري شو ما كان يعني مفكر سياسي فيلسوف، كلو ما إلو قيمة عندهن طبعاً بس لما يحكي معهن شي طرطور من الدول اللي عّم تدعمهن بالمصاري بتلاقي واحدهن صار متل التوتو… طيب هيك نظام وهيك معارضة شو دخلهن بسوريا مثلاً؟ يعني مثلاً ناس اخدوا دستور من روسيا وناقشوه، وناس حطوا عليه تعديلات… لك وعلى خود تحليلات ومناقشات…

قال ونحن نرفض، بالله شو يا حبيبي كان لازم الفكرة كلها ما تكون مطروحة أصلاً،.. لأنو لو ما كنتوا انتو الاتنين أقبح من بعض ما وصلنا لهون… هلأ منشان الأمانة بس نظام بيت الأسد ممكن يدخل موسوعة غينيس للأرقام القياسية بالسفالة والعمالة والانحطاط، بس ترا المعارضة ما قصرت بنوب، صحي مرات بتحسهن مو عرفانين الله وين حاططهن، بس والله ما حدا ضربهن على أيدهن وقلهن تعالوا صيروا “معارضة” هني اللي نطوا وكانوا مبسوطين لأنهن اجلكن الله ما بيفهموا شو هوي الفرق بين الثورة وبين شغل السياسة… حبيباتي نظام ومعارضة تضربوا ما أجحشكنوا انتو الاتنين و الله يلعن اللي ربط الكر وفلتكن… كيفكن فيا!!