بالسوري الفصيح

صدى الشام/

أي حبايبنا ان شاء الله كل عام وانتو بخير، سنة جديدة غير شكل، ما فيها موت ولا تهجير، ما فيها قصف وبراميل، ما فيها اعتقالات وتسفير، ما فيها اذلال وتحقير، وما فيها لا رئيس و لا أمير، سنة ما فيها باكستانيين وأفغان ومجاهدين وإخوان، لأنو تعبنا من كل هالزبالة اللي فاتت على بلدنا، وصار لازم نشطفها، نحن السوريين يخزي العين عنا شاطرين كتير بالشطف، صحي المي مقطوعة يا أفندي والناس عم تعبي بالبيدونات، وصحي قنينة المي صارت بهديك الحسبة، بس معليش لازم نشطف منشان النضافة لأنو النضافة من الإيمان…

بلا طولة سيرة حطينا الحصيرة وحكينا على فلان وعلان، وعلى قناة الجزيرة، وع المؤامرة الخطيرة، وع السيادة الوطنية، وكيف كنا عايشين، وكيف كانوا عايشين، وهيك شغلات، وشربنا كازوز وأكلنا مكسرات، وتفرجنا ع الأغاني والإعلانات، ونسينا كل اللي صار، وصار بدنا ننسى اللي راح يصير كمان، بس يا فهمان، قصدي يا إنسان تذكرت مثلاً بأنو بهالبلد في غيرك وغيري، تذكرت مثلاً إنو في ناس مهجّرين وناس معتقلين وناس مو معروف هنن وين، تذكرت مين السبب باللي صار، تذكرت إنو في سوريات وسوريين نايمين بالخيم والمخيمات، تذكرت قديش في ناس كانوا بحاجة لمساعدة وما في حدا ساعدهن، تذكرت مثلاً إنو صحي وقف إطلاق النار بس ما وقف الحصار، وصحي وقف إطلاق النار بس مين بدو يعمر كل هالدمار، ولك صحي وقف إطلاق النار بس لسه ما خلصنا من بشار، لساتو قاعد بقصرو، مختار ولاّ مدير مخفر ولاّ شو ما بدكن، بس هو وما حدا غيرو سبب هالدمار، معقولة هلأ صار متل التوتو بيسمع كلام بوتين وبينفذ من دون اعتراض، ليش بالله الإرهابيين اللي كان يحكيلنا عنهن وينن، طاروا مثلاً، تبخروا؟ وينن؟ لك والمؤامرة الكونية شو أخبارها ما عاد حدا بيحكي عنها، شو بطل في مؤامرة كونية من ساعة اللي إجت روسيا!! لك إي نحنا مبسوطين إنو وقف إطلاق النار، ومبسوطين لأنو أهلنا بيقدروا يناموا مرتاحين ولو شوي، ومبسوطين لأن الولاد ما بقى يخافوا من أصوات الانفجارات، بس نحنا ما رح ننسى إنو كل هالخراب اللي صار ببلدنا كان سببو كرسي، ورح نضل نهتف ولو كل العالم وقف ضدنا: الشعب يريد إسقاط النظام…