بالسوري الفصيح  

صدى الشام/

بدنا شوية أمل، شوية أمل بيكفوا لنقدر نكمل، شوي مو كتير، لأنو إذا كان عنا أمل كتير، بيصير فينا متل ما صار أول مرة، قصدي بنكتشف إنو القصة مو سهلة وما بتخلص بمظاهرات وانشقاقات، ولا حتى بث مباشر من قلب الحدث، القصة أكبر من هيك بكتير، ولهيك لازم يكون عنا أمل صغير بيكبر، مو أمل كبير بيصغر، هدول اللي كانوا بأول الثورة يقولولنا الشغلة خمس شهور ست شهور بالكتير، كانوا مو عرفانين شو عم يحكوا، والتانيين اللي كانوا يقولوا بكرا بتشوفوا شلون بيسقط النظام بس نوصل ع الشام، كمان كانوا عم يضحكوا علينا، مو لأنو هني كدابين أو خاينين متل ما بيقولوا عنهن الناس هلأ، لأ أبداً، بس لأنن ما بيعرفوا، إي ما بيعرفوا شو يعني إنك تشيل نظام صارلو خمسين سنة، حزب وجيش ومخابرات، وموظفين وفنانين ومثقفين، وصحفيين، ومو بس هيك نظام ما عندو أخلاق بنوب، ولا بيعرف شو يعني الأخلاق، لهيك، عمل شغلات ما في حدا ممكن يعملها، لك بس التلفزيون تبعو بدو عشر ثورات، تعالوا نتذكر بما إنو هلأ فرصة لنراجع وين غلطنا، قليلة شغلة سطل اللبن، وقليلة كيف كانوا يجيبوا الناس ويبهدلوهن ويخلوهن يعترفوا قدام الكاميرا بأنو هني خاينين وشركاء بالمؤامرة الكونية، وقليلة قصة جهاد النكاح، هاي لوحدها جريمة عالمية ولازم ما حدا ينساها أبداً، طيب شلون بالله كان بدو يتغير كل هالشي بخمس شهور وسنة وسنتين، لك والله ولا بعشر سنين، لأنو إذا مفكرين إنو الثورة بمصر وتونس نجحت بتكونوا غلطانين، لهيك لا تفكروا إنو الطريق خلص، وإنو يعني مثلاً إزا راحت حلب بتكون راحت الثورة كمان بتكونوا غلطانين، يعني مثلاً في أولاد طلعوا بالباصات رافعين إشارة النصر، حاولوا ترجعوا تشوفوا صورهن، شوفوا عيونهن، شوفوا قديش فيها تحدي وإصرار، شوفوا قديش فيها أمل، كلهن كانوا عم يقولوا رح نرجع ع حلب، وهالشي لوحدو بيكفي ليكون عنا ثقة إنو القصة لسه ما خلصت وما رح تخلص لأنو لسه في أمل، روحوا شوفوا عيون المصريين والتونسيين… وإلا بتعرفوا شو بلاها، لأنو إذا شفت عيونهن رح تفقدوا الأمل، خلينا متمسكين بالأمل مهما كان صغير لأنو الأمل الصغير بيكبر….