بالسوري الفصيح

صدى الشام/

بدكن الصراحة إلي كم يوم ما بطلت ضحك، خير اللهم اجعلو خير، إنو كنت ماشي بأمان الله بالشارع، وإجت بوشي جريدة الوطن، تبع رامي مخلوف ما غيرها، وفيها لقاء مع مين يا حزركن، برافو مع العينتين أبو رقبة، وبتعرفوا عن شو كان عم يحكي، لك لأاا مو عن السيادة الوطنية والديمقراطية والحرب ع الإرهاب، لأنو هادا الحكي مو مهم، لك كان عم يحكي ع الفساد، إي والله، وبتعرفوا وين؟ بالإعلام، قال شو الإعلام فيه فساد، لك له قول غيرها، عدل بدل يا حبيب لا تتهور، الإعلام الوطني البطل الشجاع، فيه فساد، يا لطييييف اللطف، يعني بصراحة احترت شو بدي قول، إنو معقول يكون العنوان غلط، معقول يكون عم يحكي عن الفساد بقناة العربية مثلاً، لأنو معقولة إعلام الممانعة والصمود بيكون فاسد، لك إييييه طلع فاسد، يعني راحت السكرة وإجت الفكرة، والفكرة اللي طلعت براسو الزعير منشان يقول للناس إنو صاحيلهن هي إنو يحكي عن فساد الإعلام، وكأنو عم يحكي عن اكتشاف الدولاب، لك يا فهمان أصغر واحد بسوريا ومن لما كان أبوك قاعد ع الكرسي بيعرف إنو الإعلام حاوية فساد كبيرة، ويمكن والله أعلم ما في حدا فات ع التلفزيون إلا ما كان فاسد، كبار صغار بيفهموا ما بيفهموا كلو كان فاسد، لأنو التلفزيون يا فهمان هو بلوعة الفساد ببلد من أولو لآخرو فاسد، من جنابك اللي قاعد ع الكرسي بالواسطة لأنو أبوك كان رئيس، لحد ابنك اللي طلع طالب متميز رغم إنو فهمان متلك وبعثتوه ع الصين، و أمو قالت إنو بدو يصير بالمستقبل رئيس، فما وقفت ع التلفزيون ولا على كم ألف كلب جعاري شغالين ينبحوا من ستة وأربعين سنة بأوامر أبوك وأوامر سيادتك، وعناصر سيادتك، لأنو يا فهمان إزا وقفت عنهن الفساد وحاربتو متل ما كنت عم تحكي بجريدة الوطن تبع ابن خالك رامي الحرامي اللي كان واحد من أسباب الثورة، بحب خبرك إنو كلابك كلهن راح يبطلوا ينبحوا منشانك وراح يصيروا ينبحوا عليك، ويمكن يعضوك كمان، فمنشان الله اسكت ولا بقى تحكي لا بفساد ولا بغيرو خليك بالمقاومة، منيحة المقاومة، شو ما عاد حبيتها؟ قول إنك عم تحارب الإرهاب، منيحة هالحكاية، احكي عن سوريا الحديثة وإنجازاتك، احكيلهن للناس قديش عم تعمل إنجازات عظيمة لحتى ما ضل حجر على حجر بسوريا، ونصيحة لا تحاول تقرب على زبالة كلابك، بيعضوك، اتركن عم ياكلوا ويعفشوا وهني مبسوطين، بياكلوا لحم جيف ومبسوطين، هاي نصيحة مجانية، والنصيحة كانت بجمل يا بهمان…