بالسوري الفصيح

صدى الشام/

رجعت ريما لعادتها القديمة، قديش بحب هالمثل، لأنو كتير حقيقي وكتير واقعي، وكتير بيزبط مع كتير من أوضاعنا نحن السوريين، وكتير بيتكرر يعني يمكن كل يوم بتسمع حدا عم يقول هالمثل، لما بيحكوا عن قطع الكهربا مثلاً، أو لما بينزل المطر وبتمتلا الجور بالشوارع، ولما بيطلع شي مسؤول بيكزب، ولما بيضحكوا علينا بشي شعار من الشعارات مثل حق الرد، يعني إنو محتفظين بحق الرد من شي ألف سنة، إسرائيل بتضرب، عدوان همجي واعتداء على السيادة وهالحكي المعفن، وبعدين إن سوريا تحتفظ بحق الرد، كنا قاعدين من كم يوم بالقهوة، متل العادة يعني ما في شي جديد، ونط أبو صطيف  كان معصب وعم يلعن هاليوم المشؤوم، ليش لأنو أبو زهدي غلبوا بالمحبوسة وجابوا خشب، يعني ما خلاه ياخد ولا شوط، كان أبو صطيف عم ينط ما يحط، وأبو زهدي عم يضحك، لك طولوا بالكن يا شباب هي لعبة طاولة، مو محرزة تخسروا بعضكن منشانها، والله لأفعل وأعمل، وأكيد كان عم يغش، أبو حسين اللي كان قاعد بيناتهن حلف يمين إنو أبو زهدي ما كان عم يغش، بس أبو صطيف ما عجبوا هالحكي وقللوا أصلاً انت متآمر معو ضدي، وصاحوا الرجال اللي بالقهوة كلهن المؤامرة كبيرة يا أبو صطيف، ولازم ترد فوراً، ضحك أبو صطيف وقال وهو وعم يسحب نفس من أرجيلتو لا حبيباتي ما حزرتوا، أنا بحتفظ بحق الرد بالزمان والمكان المناسبين، ضحكنا ونسينا الموضوع لأنو أبو صطيف قعد وصار يلعب دق طاولة مع ابن أختو شب عمرو شي عشرين سنة، وبعد شي ساعة نط أبو صطيف وكان مبسوط هالمرة، لك من كتر ما كان مبسوط وقف ع الكرسي، وقال شفتوا هي رديتلو إياها لأبو زهدي، غلبتو لحسن غلب عالمي، طيب شو دخل حسن بالموضوع؟ قال أبو صطيف ولو كيف شو دخلو مو حسن ساكن بحارتو لأبو زهدي، بس حسن ابن أختك شو نسيت؟ لأ ما نسيت حبيباتي، بس انتو بتعرفوا إنو حسن ساكن بحارتو لأبو زهدي، وهيك علمت على حارتهن، لك يا زلمة كبر عقلك، هداك غريمك شو دخلو ابن أختك المسكين؟ شو دخلو، شو دخلو لك والله انتو مو فهمانين شي، هلأ لما بدي روح لعند بيت أختي بدو يكون أبو زهدي خبر الحارة كلها إنو غلبني، وبيسود وشي قدام الحارة، بس لما بيعرف إني غلبت حسن ابن حارتو رح يحط لسانو بتمو وما يجيب سيرتي بنوب، قال شو دخلو قال، هاي مؤامرة عم قلكن، بس انتو مو فهمانين شي، مؤامرة مشتركين فيها الكل أبو زهدي وابن أختي وأبو يوسف صاحب القهوة، وأبو حسين، وانتو كلكن كمان، أنا ما حدا واقف معي إلا شوية ناس محترمين لأني زلمة محترم…طبعاً حمل أبو صطيف حالو ونفش ريشو متل الطاووس وطلع من القهوة… وبعد ما طلع ضحكنا، ورجعنا كل واحد على طاولتو… صحي نسيت خبركن، هاي المرة العشر تالاف يمكن اللي بيخسر  فيها أبو صطيف مع أبو زهدي، وبيردلوا ياها بحسن ابن اختو… يعني شو ريما خانم ما بتتغير.. بنوب بنوب… سمعونا صباح فخري: ردي ردي ردي… عليه ردي.