بالسوري الفصيح

صدى الشام/

تتذكروا لما حكينا من فترة على العيشة الغالية والرواتب اللي ما عم تكفي، وكيف نحنا يا مواطنين معترين وعايفين حالنا من الغلا وانو يعني يا دوب عم نقدر ناكل ونشرب، اتذكرتوا؟ إي عظيم معناتو أكيد سمعتوا إنو مو بس نحنا وضعنا صعب طلع الوزراء المساكين ع الحديدة يا خطيتهن، ما معهن ياكلوا يعني متلن متلنا، عم يتدينوا منشان يكملوا الشهر، بتعرفوا إنو هالحكي مو من عندي مو هيك، وإن اللي حكاه رئيس الوزراء زات نفسه بلحمو وشحمو وع التلفزيون السوري، تبع سوريا بخير، طيب إذا دولة المواطنين فيها عم يشحدوا والوزراء عم يشحدوا، وشوي تاني رح يقولوا إنو ضباط الجيش كمان عم يشحدوا، طيب مين عايش بهالدولة؟ إنو عنجد عم نحكي، لأنو يعني نحن كنا مفكرين إنو يعني ع القليلة الوزراء عايشين. ومبسوطين منشان يقدروا يسهروا على راحتنا ويأمنوا احتياجاتنا وهالحركات يعني، وما عم يقدروا يأمنوها ولا رح يقدروا ولو ضلوا قاعدين ١٥٠٠ سنة ضوئية، لأنهن ما بيعرفوا ومو فهمانين الخمسة من الطمسة ولأنهن ماشيين هيك بتوجيهات من شي مساعد أول بالمخابرات ما بيعرف راسو من رجليه، وهيك ماشية الأمور قصدي مو ماشية ولا شي بس هيك عم يقولوا إنو ماشية الأمور، مو من اليوم ولا من خمس سنين لااااا من شي خمسين سنة يعني هيك شي بيشبه مفركة البطاطا، بتحط كم حبة بطاطا مع شوية زيت وتخليها تنطبخ شوي وتقول إنك طبخت، ويمكن متل الجظ مظ كمان على اعتبار إنو نحنا بلد شعارو بوط عسكري، فأكيد لازم تكون الأكلة الرسمية تبعو هي البوط العسكري، إي ما علينا نرجع للأستاذ خميس وحكياتو الظراف، انتو انتبهتوا مين اختار ليضرب فيه مثل على موضوع الفقر اللي عايشينوا الوزراء، لك إييييه، وليد المعلم، أكبر وزير وأقدم وزير وأتخن وزير، هيك يعني ما قال وزير البيئة ولا وزير الما بعرف شو، لأ وزير الخارجية اللي بزماناتو بلع أوروبا، لك إنو معقولة واحد بلع أوروبا ما بيقدر يكمل الشهر غير ليشحد، معقولة هالبهدلة يا وزير الخارجية، ما عندو شوية مصاري ضاببهن على جنب منشان الأيام السودا، ما عندو شي شقفة أرض ورتانة عن جوز خالتو يبيعها أحسن ما يروح يتدين من هاد ومن هاد ويبهدل حالوا وشيبتو، طيب إذا هيك وضع وزير الخارجية شو وضع باقي الوزراء، يعني بس ما بيكونوا عم يشتغلوا بعد الضهر، شي على تكسي وشي على بسطة بالحميدية، وشي محاسب بقهوة أو مطعم، شي بيزعل إي عنجد، ولهيك وتقديراً منا نحنا المواطنين الشرفاء لجهود السادة الوزارء بالسهر على راحتنا وما بعرف شو كمان أنا برأيي نعمل جمعية وأول واحد بيقبضها يكون أبو خالد وليد المعلم، يعني منشان نثبت ولاءنا للقيادة السياسية الحكيمة اللي خلتنا نشحد منشان تضل قاعدة ع الكرسي… بس بتعرفوا شغلة هيك بلد وهيك رئيس بدو هيك رئيس وزراء وهيك وزراء بيكذبوا كذبة قد قاسيون لأنو إذا كانت كذبتهن صغيرة ممكن تتصدق فأحسن شي يكذبوا كذبة كبيرة وعمرو لا حدا يصدقها، ليش هني أصلاً شايفين غير خواريف حواليهن…. ماااااااااااع