بالسوري الفصيح

بنت ترامب ومرت ترامب وأخت ترامب ومرت خال ترامب، ما ضل وحدة من بيت ترامب إلا وجابوا الشباب صورتها وحطوها، وصاروا يتصببوا عليها، لك العما نسيوا المصيبة اللي نحنا فيها، وقعدوا يتفرجوا على هالنسوان الحلوة، واحد “محترم” كتير كاتب على صفحتو ع الفيس إذا هاي بنتو لترامب حقو يصير رئيس مو أحسن من أوباما المشحور ومرتو العبدة، عنجد عم حاكيكن هيك كتبوا الناس، وفي حكي من الزنار ونازل مو حلوة نحكيه بس شفتوا كمية السخافة اللي وصلنالها، طبعاً ومنشان ما تصير السيرة سيرة بيت ترامب، فلازم الواحد يعرف إنو بالوقت اللي الناس كانت عم تتصبب فيه ع العيلة الكريمة، كانت روسيا نازل قصف على روس الناس بدوما وإدلب، وحلب، ووين ما بدكن كمان، وكانت قسد عم تهجر الناس من الرقة بعد ما أخدت أوامر أميركية بأنها تحارب داعش، ويمكن في كتير ناس نفسهن اللي كانوا عم يدوروا على صور بنتو لترامب شافوا صور المهجرين بالرقة بس قالوا لحالهن شو هالشغلة يعني، سعرهن بسعر اللي اتهجروا، وعم حاكيكن جد ما عم أمزح، طيبوا مرتوا لبشار الأسد ماشي حالها، وابنو ماشي حالو، وبنتو بس تكبر بيجوز تصير حلوة متل أمها، معناتو لازم يضل رئيس شو رأيكن؟ عيب والله صار شي بيخجل، لهالدرجة صار دمنا  رخيص علينا، نسينا  الشهداء والأمهات والمشردين وانزلنا لهالمستوى الرخيص، ما بقا في شي يهمنا غير مرتو وبنتو، طيب وسوريا؟ خليها على الله… أيوا قلت لي يعني انتو صدقتو إنو رب العالمين رح ينصركن متل ما قاللكن المحيسني، لأنو قال يعني نحنا مؤمنين وعم نقاتل القوم الكافرين، بشرفكن  إذا في تلاتين فصيل بيصلوا وبيصوموا وكل واحد لحيتو موصلة لصدرو عدم المؤاخذة وكل يوم بيتقاتلوا وبيحاربوا بعضهن ونازلين فتاوى تكفير ببعض، معقولة رب العالمين ينصر ناس نسيوا دم الشهدا وانشغلوا بفستان بنت ترامب، معقولة رب العالمين ينصر شعب بيسرق إغاثة، معقولة رب العالمين بينصر شعب بيقتل بعضو منشان الغنائم… أنا ما بظن رب العالمين بيحب المنافقين، ونحنا والحمد لله شعب نصو منافقين، ونصو التاني عم يموتوا بالقصف لأنو المنافقين مشغولين شي ببنت ترامب وشي بفتاوى ما أنزل الله بها من سلطان… ما رح ننتصر إذا ما تذكرنا إنو نحنا طلعنا بثورة حرية وكرامة مو بثورة ترامب وعمامة….