بالسوري الفصيح

صدى الشام/

الفين وواحد وعشرين، والله مو مزح، صاحبنا قال إنو بقيان لهداك الوقت، قاعد ولا هامو شي، تخرب، تصير الناس كلها برات البلد، يموتوا مليونين تلاتة ما في مشكلة المهم انو حضرتو يضل قاعد ع الكرسي، تاكلوا والا ما تاكلوا ما بيهم، في كهربا والا ما في كمان مو مهم، خايفين عايشين متل الشحادين، كمان مو مهم… المهم هو قاعد ع الكرسي، ومرتو مبسوطة وعم تشتري تياب وولادو عم ينبسطوا، يعني ألفين وواحد وعشرين مو كتير بعيدة خمس سنين، وتعالوا نحسبها بالورقة والقلم، شو رح يصير بعد خمس سنين، رح يصير حسن عبد العظيم وهيثم المالح فوق التسعين، وكيلو السكر بشي عشرين ألف ليرة ورغيف الخبز بشي ألف ليرة، وبتكون الكهربا صارت تيجي مرة بالشهر، هاي إذا بقي كهربا أصلاً، وراح يتغيروا كل رؤساء العالم، ورئيس الجمعية الفلاحية بضيعة أم الطنافس، وبتصير سولاف فواخرجي نقيبة الفنانين، وبيكون أدونيس لساتو عم يستنى جائزة نوبل، وجيش الفتح عم يحاول يفك الحصار عن حلب للمرة الخمس تالاف، والطيران الروسي عم يقصف بريف حماه، وبكر البغدادي ابنو لأبو بكر صار سفير الدولة الإسلامية بالأمم المتحدة، وطبعاً لسه الصناديق الصفرا عم تروح ع الضاحية الجنوبية، وصار الجامع الأموي حسينية، وغيروا اسم الشام وصار اسمها ايران الصغرى، وبيطلع عادل الجبير وبيقول إنو بشار الأسد لازم يرحل بحلول سياسية أو عسكرية، وما بيعود في قتال بين الفصائل بالغوطة لأنهن أصلاً رح يكونوا صاروا كلهن بإدلب، وفي إعلان مهم إنو معركة الساحل القادمة رح تغير المعادلة، وبيضربوا الشباب صاروخين بعدين بتجيهن الأوامر ويوقفوا، والناشطين ع الفيسبوك عم يغيروا صور بروفايلاتهن و يدعوا لوقفات احتجاجية قدام السفارات الروسية احتجاجاً ع المجزرة اللي عملتها القوات الروسية بريف حماه، وفي وحدة ناشطة قاعدة ما بعرف وين عم تعمل فيديو بتسب فيه الفصائل وبتتهم الإسلاميين إنهن سرقوا الثورة، وفي جماعة ترفض تسليح الثورة، وفي ناشط كبير ومعروف عم يكشف حقائق مهمة، وفي تسريبات عم تطلع بأسماء المطلوبين لفرع الحبوب باللادقية،  وفي خبر عن واحد سوري لقى ألف دولار بألمانيا ورجعهن… وأهم شي أهم شي إنو في بيان للائتلاف  بيطالب فيه المجتمع الدولي بالضغط على بشار الأسد منشان ما يغير الدستور ويحط ابنو رئيس…